大半年前我公司有個同事叫Joey，佢出名「好打得」，真係一個人做幾個人嘅嘢，但係加薪嘅幅度就係每年$200, $300, $500呢個水平，所以佢喺度做咗6年，人工都唔過2萬。其實Joey連續幾年都有反映問題，可惜一直被老細無視，仲覺得加500嗰次已經係皇恩浩蕩。
或者你會話，間公司出手咁低，老細又咁孤寒，我呢個投稿人都唔慌人工高啦，講人嘅故事之餘，我咪又係幫緊無良老細打工做奴隸！咁你又錯喇，唔知點解後來先入嚟做嘅同事，人工係會高過舊同事，因為個老細嘅準則好奇怪，佢覺得而家請人就要用而家嘅人工去量度，舊人就係用當時嘅人工做標準。
舉個例，Joey當年嚟做係得16000蚊人工，老細認為每年加佢幾百係好合理，因為計埋物價通漲去upgrade佢份糧，而有個新嚟嘅Junior開價21000，老細因為睇完好多人份CV都係要求2萬左右，所以就得出2024年請新人都要2萬呢個概念，我哋公司就係咁樣運作，唔知其他人嘅公司有冇呢種現象呢？
結果Joey終於忍無可忍，大半年前決定辭職，仲要係裸辭嗰隻，都係老生常談嘅情節，老細唔擔心請唔到人，亦唔覺得Joey係無可替代，所以係咁易問咗幾句就放人走，跟住出job ad請replacement，新人返工，交接工作，一切就係咁easy come easy go，當時係冇任何問題。
後來得返新人自己做，咁就梗係搞唔掂啦！基本上Joey呢個position已經係好重work load，正常應該要兩個人做，如果大公司隨時將個position一開三，不過都好合理嘅，之前Joey自己食晒，老細見無事無幹就唔會覺得有咩問題，跟住輪到新人單拖去做，甩甩漏漏就經常出現，而且新人份糧係高過Joey幾千蚊㗎！
做咗個半月左右，新人辭職唔撈，你都知試用期內好快走得㗎啦，又唔係即刻請到人，搞到老細要assign其他部門嘅同事去share咗啲工作，好快又引起不滿喇，唯有急急腳再請人啦，第二個新人做咗唔夠7日就閃，第三個新人仲癲，食lunch已經自己走咗去無回頭，佢連半日人工都費事問我哋追。
不過老細又好「公平」，佢見以前Joey一個可以處理晒啲嘢，堅決唔會請兩個人返嚟share，仍然係一個代一個，而呢份堅持嘅代價就係幾個月內請咗7個人，然後又走咗7個人，我哋班同事都講笑咁講過，Joey個位係每個月都唔同人，好似每月之星咁，坦白講句都記唔到新人個名，記得嚟又走，更加試過叫錯。
究竟老細點補救個問題呢？請人方針已經由新人改為有幾年經驗嘅人，起薪點亦由20k加到上去26k，人係請到呀，出26k嘅時候好多CV㗎，不過啲人係覺得26k做緊30幾k嘅嘢，覺得唔抵所以又走之嘛，所以銀彈政策都解決唔到長遠問題。
如是者，老細嚟一招事急馬行田……打畀Joey叫人返嚟做，起初幾好笑㗎，佢又話加$500畀人，即係仲未肯畀超過2萬，就想人哋食回頭草，Joey冇答應，其實冇爆粗鬧你都偷笑啦，不過Joey本身性格好斯文嘅，可能只係心裡面講粗口啫！
隔咗一排，老細直頭叫咗幾個同Joey熟嘅同事做說客，包括我，好有誠意㗎喇，第二次開價22000, Joey照樣reject，第三次「狠開」25000，Joey都係睬佢都傻，換言之老細三顧草廬都係食檸檬，其實仲有第四次，老細final係開價27000加埋答應佢請多個assistant減輕工作量，但我覺得就算你開37000，Joey都係唔會考慮，風骨問題。
老細之所以咁堅持，係因為佢知道Joey其實唔係有新嘅全職工作，所以成日覺得肯畀錢就有機會，據我理解，Joey辭咗職之後轉搞一啲手作仔生意，幫人織嘢、整公仔、整擺設，閒時仲會做part time老師教人畫畫，聽落好似係幾多元化，但係收入就好唔穩定，因為手作仔job係有order先有得做，生意比較飄忽，有時一個月爆單，有時又可以成個月冇單。
咁Joey嘅收入又維持喺咩水平呢？佢自言拉勻嚟計仲少過之前喺度返工，平均萬幾蚊一個月，唔肯返嚟嘅其中一個原因係對我哋公司已經死心，呢個我明，加上唔同人有唔同嘅表達方式，有啲人會爆舊公司一鑊，而Joey就靜靜地冇出聲，只係一次又一次拒絕老細邀請回巢。
其實唔使話咩報唔後復，見到老細而家手忙腳亂，個心涼晒就夠啦，俗啲講句，真係「屌你都廢事」。
而Joey另一個唔肯返嚟嘅原因，係因為佢好enjoy而家嘅手作仔工作，賺得少，不過開心，而且時間可以自己控制，閒時做下其他嘢放慢腳步，忙嘅時候又因為做緊啲鍾意嘅嘢，所以又係另一種享受。
不過講開又講，搞咗大半年都未搵到個人駕馭Joey嘅當時工作，我都唔知公司點收科。