一年前見咗份工，經歷3個回合嘅interview，HR同我講：「應該冇問題㗎喇，而家係等馬來西亞總公司嗰度confirm，預計下星期會有回音。」HR冇呃我呀，真係一個星期有回音，不過係壞消息，佢話馬來西亞嗰邊嘅Asia Pacific in charge嫌我學歷差，所以冇辦法出offer喎！
學歷我真係無能為力，即刻進修都趕唔切，咁唔通跪低喊住求人哋畀機會咩，咁咪算囉，反正當時我有另一個offer，就係而家做緊呢間公司，有工就返咗先啦！點知當我份工返咗3個月過埋試用期之後，又收到呢位HR打嚟嘅電話：「Good news! 因為馬來西亞嗰邊換咗個in charge，你個offer可以照舊呀！」
好坦白講，打工都係睇錢㗎啫，嗰間嘢嘅人工同福利都遠超我而家返緊份工，加上我知道上次臨天光瀨尿其實唔關個HR事，既然係咁，真係可以諗諗喎！
HR：「不過你要循例in多一次，視像就ok㗎喇，其實都係見下個新嘅Asia Pacific in charge，佢係中國人嚟嘅，普通話你有冇問題？」
之前佢哋個in charge雖然係新加坡人，不過就只識得講英文，可能係interview對住我先至全程英文啦！
如是者，我又視像見佢哋呢個新話事人，全程好愉快㗎，點知同日已經收到個HR回覆：「Sorry，我哋個in charge話都係想見多幾個人先，而家呢個position重新開始招聘。」屌！玩咩！
其實呢次視像interview已經畀一個同事撞破，因為我當時蛇咗入會議室，我同事又咁啱匿入嚟想講私人電話，所以佢睇到同聽到我用普通話做自我介紹，好在同佢都算friend，加上知道都冇咩所謂，我亦有將件事同佢分享過。
不過見工單嘢未完，半年後，同一個HR又再call我，佢話公司之前揀咗另一位求職者，點知嗰個人做咗兩個月就走咗，而且仲留低好多蘇州屎，嗰位Asia Pacific in charge又再重新考慮我……
我：「咁仲使唔使interview？」
HR：「都要，不過唔係見in charge，因為我哋香港office呢邊有個manager轉咗，今次你淨係上嚟見一見佢就得㗎喇，in charge反而係ok咗！」
咦喂，最大粒嗰個開咗綠燈喎，反正之前都in咗兩次，計埋第一次total in 3輪，一共都見咗4次，照計冇問題啦，何況我只係請半日假啫，又唔係要我辭咗份工即刻過去，冇嘢輸吖！既然做咗幾次傻仔，唔爭在做多一次，當係搏多個機會畀自己。
我真係太天真太傻喇，請咗半日假去見呢個新任香港manager，佢態度係非常之囂張，人哋個Asia Pacific in charge大粒過佢都冇咁寸，嗰次in完之後已經知道冇行，果然不出我所料，HR迅速call back我講唔好意思，唉，呢句我都前後聽咗3次啦，玩夠未呀？
之前撞破我嗰位同事見我請半日假請得咁急，竟然識穿咗我去見工，佢問我點解成日搵工，做乜成日諗住走，我答：「唔係成日搵工呀，同一份嚟咋！第一次過五關斬六將，最後嫌我學歷唔夠好，跟住話換咗負責人，叫我試多次，點知衰咗，最近就話負責人都係覺得我ok，想我見一見個新manager，所以一直以嚟我都係見緊同一份工。」
上星期我再收到電話，今次唔係轉in charge，都唔係轉manager，而係轉HR，呢位新HR話：「因為我哋唔打算再公開招聘喇，希望喺之前嘅求職者裡面搵適合人選，管理層會重新考慮，你有冇興趣見一見？」
我：「其實係咪請一個走一個？你上一手個HR同我講，之前有個人做咗兩個月就唔做，而家又走咗人？」
新HR隔住個電話都聽到佢嘅尷尬笑聲：「係呀，不過工作呢啲嘢都係人夾人，佢哋做一陣唔做又唔代表你都會咁㗎嘛！」
我：「但係你哋內部都成日轉人喎，Asia Pacific 嘅 in charge又轉，香港Manager又轉，而家連HR都轉……」
新HR：「哦，員工流動呢啲好正常啫，冇舊人走又點會有新人入呢？言歸正傳先，因為得之前個HR見過你，我都想見一見先再遞畀in charge，你呢兩日有冇時間上我哋公司？6點後都得㗎喎，我冇咁早走，咁你咪唔使特登請假囉！」
我今次主動同嗰位話我成日見工嘅同事分享，佢聽完都笑咗：「白痴！信佢至奇啦！唔使請假啫，你放工走上去唔係時間呀？換轉係我直頭用粗口鬧佢添呀！自己入面傾掂數先啦！」
我：「但我應承咗今晚上去……」
然後呢位同事對住我講咗句粗口，跟住話：「佩服你陪間公司玩足一年」
我：「搏下啫！橫掂都見咗幾次，或者呢次真呢！」
最終我有去in，而家等咗一個星期喇，仲未有回音，係咪嗰間公司又有人事變動呢？抑或我又做多一次on9仔呢……(完)