我42歲，只係做過兩份工，以前覺得係優勢，因為夠穩定吖嘛，點估到之前去interview嘅時候偏偏就成為致命傷……我咁講又有啲嚴重嘅，最衰都係自己10年前搬屋遺失咗第一份工嘅reference letter，呢樣其實唔可以怪人。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
第一份工我做咗8年，唔算大公司，同事間感情都好好，個別一兩個去到今時今日仲會聯絡，雖然只係大時大節先send下msg問候，不過都好難得啦，老細當時因為移民就冇做喇，之後我就轉咗另一間公司，期間因為抽到公屋而搬過一次，就係嗰陣時唔見咗第一份工嘅reference letter。
其實唔止reference letter，我仲有一張畢業證書同成績表都唔見咗，但後兩者仲可以申請補領，reference letter就補唔返喇，始終個老細移咗民，公司又結束咗。
第二份工我都做得好穩定，足足做咗11年，我份人好懶，習慣咗一個環境加上做咗咁耐，所以從未考慮過轉工，點知呢間公司空降咗個新高層，江湖從此多事，新高層睇某啲同事唔順眼，包括我，結果我都要執包袱走人，原來有時唔係你想做過世就得，世事仲有好多變數，咁冇所謂嘅，搵份新工囉，而且我之前咁stable，求職照計係優勢吖！
最終我搵工搵咗3個月先搵到，其實都幾好笑，一份工做8年，一份工做11年，穩定係優勢呀，不過42歲又變咗劣勢呢，唉！
唔緊要啦，終於都叫做有人肯畀機會，點知呢個時候就出現問題喇，做咗11年嗰份工嘅高層因為唔妥我，走嘅時候大家都嘈咗幾句，所以佢哋喺我走咗之後幾個月都仲未出reference letter畀我，因為咁已經打返去追過幾次，但依然被留難，3個月都出唔到一封reference letter？你有心畀其實幾分鐘都搞掂啦！
我去interview嗰間公司其實進展順利，不過HR話我做咗20年嘢，一封reference letter都交唔出真係冇辦法聘用我，呢個係佢哋公司規矩，因為啲資料仲要過佢哋head office另一個人事部……
可能你會覺得佢咁講好唔識變通同埋好冇人情味，但係將心比心，有一個人嚟interview，唔係fresh grad，係一個有成20年工作經驗嘅人，竟然連一封reference letter都拎唔到出嚟，某程度上又真係幾可疑，始終新公司唔識我，點知我係咪老作experience呢，所以我唔怪得人，要怪只可以怪自己連第一份工嘅reference letter都唔見埋，因為新公司個HR已經開晒綠燈，講到明最新一份可以慢慢候補，但at least都要畀到再對上一份工嘅證明。
上一份工即係我人生第一份工，公司結業，老細移民，我點嘔出嚟……
因為咁，我搵返第一份工仲有大時大節send祝福msg嚟嘅一位同事，睇下有冇咩辦法咁啦，或者當年個HR & Admin仲有資源或者方法可以出過份reference letter畀我呢……雖然係好渺茫，但我對上一份工明玩嘢唔肯畀reference letter，我實在係無計可施喇！
冇任何工作證明文件，我份新工亦企咗喺度，某日我突然收到個電話，係第一份工個老細打長途畀我：「好耐冇見喇，我係戴生，聽講你唔見咗工作證明喎，我寄畀你吖，你講講個地址我聽。」
我簡直唔敢相信發生緊嘅事！原來我之前搵個舊同事求救，其實佢都搵唔到當年個HR & Admin，十幾年前喎，電話都改埋啦，但係呢位舊同事就搵到當年一個Sales，個Sales同舊老細好好感情，即係打長途畀我嗰位戴生，輾轉傳達訊息之後就連繫到喇！
戴生話佢移民嗰陣，仲有帶舊公司一疉有抬頭logo嘅信紙走，亦有帶舊公司嘅印，原意只係留念，冇諗過今時今日要拎返出嚟打工作證明畀我。
戴生問我全名同埋身份證號碼，跟住就著手打reference letter，仲話寄Fedex畀我……嗰種感激同埋感動好難形容，而家講返都眼濕濕。
最後份新工見唔見得成？
戴生打長途電話畀我之後嘅第二日，其實新公司個HR已經幫我解決咗個問題，佢話我上一份工冇reference letter唔緊要，畀返當年入職嘅contract佢，同埋影印銀行簿或者銀行statement，show到最後一個月嘅出糧紀錄就得喇！
換言之，最後呢份新工都係請咗我，然後再隔多一兩日我先收到戴生寄嚟嘅Fedex文件。
雖然新工唔係因為戴生補寄嘅reference letter而獲聘，但係我拎住呢份快遞文件，內心好激動，十幾年喇，呢個舊老細仲願意幫一個舊部打工作證明，仲要出埋錢寄Fedex，當然仲有我嗰位舊同事，佢兜兜轉轉搵到舊公司個Sales，最後先至會出現呢個結果，愈講愈掛住我第一份工，唔知點解，我覺得以前嘅公司係有人情味啲。
新工已經返咗一個月，我仲未收到上一封工嘅reference letter，反而十幾年前份工嘅reference letter就失而復得，同一份文件，兩種截然不同嘅處理手法，人情冷暖睇得好清楚。
同時我都想讚下新公司個HR，佢比較靈活同埋人性化嘅安排，令我不致於失去一個工作機會。
今次我會好好保存舊老細戴生寄畀我嘅reference letter，希望好人真係會一生平安。（完）
呢次Reference letter事件，其實嗰位舊同事都幫咗好大忙，唔係個個咁醒㗎，以下呢單就夠經典啦！
Reference Check搵救兵 豬隊友扮前上司
https://hkofficedaily.com/?p=15869