今日老細帶咗個女返公司，4歲妹妹仔，叫欣欣，個個丟低工作氹佢，當時我覆緊WhatsApp冇乜點理，但老細個女眼定定望住我，有條擦鞋Old Seafood可能見機不可失，即刻攝出嚟：
「佢想玩你部iPhone呀！呢個姐姐咁孤寒嘅！嚟！叔叔借我嗰部畀你玩！要唔要睇卡通呀？睇Let it be好唔好？」
已經有同事話Let it be係Beatles，係咪講緊Let it go？個Old Seafood仲兜：「係呀，冰雪奇緣吖嘛！」
然後Old Seafood遞咗自己部iPhone畀老細個女，開埋Let it go，心諗立大功啦，點知老細個女原地放手，成部iPhone跌落地，值得一提嘅係office嗰忽地板係鋪磚唔係鋪氈，啪一聲非常清脆！
最正係咩？係部iPhone冇爆mon冇爛，嗱！呢啲先攞命，你個心實凝住有嘢壞，或者第日有問題就會諗起呢單嘢，而家冇明顯傷痕又唔可以叫人賠。（何況Old Seafood都唔會咁做，佢要形象吖嘛！）
從微表情觀察到Old Seafood好緊張，一路話冇事冇事，又一路反轉部機重複檢查。
老細都好識做……佢同個女講：「欣欣，咁唔小心㗎咩！快啲同叔叔講sorry先！」
不過佢個女冇講