
上文提要,因為聽到同事講:「我阿媽到而家都唔知我份工係做乜?」所以老細宣布搞個公司Open Day,叫員工帶老豆老母嚟公司參觀,但由於反應冷淡,後來改為邀請任何親屬都可以,仲提供lunch buffet同埋提早放半晝等條件利誘,加上各部門主管「捽數」施壓,最終有十幾個同事屈服,真係叫咗屋企人嚟公司個開放日。
其中一位叫阿恆嘅同事,佢老豆老母七十幾歲㗎喇,估唔到咁活潑可愛,喺office周圍走影相,仲要捉住老細係咁合照,唔知以為追緊星,差在未拎埋簽名,不過老細亦好配合,更出於好心講咗句:「世伯伯母,唔好叫你個仔揸機啦!我搵其他人幫手影,咁我咪可以同你成家人齊齊整整影張相囉!」
點知阿恆個老豆咁樣答:「唔使啦!我個仔都唔鍾意你,我、老婆,同埋你三個人影得㗎喇!」
老細呆一呆,我真係笑到反艇,見到其他同事都笑到震晒。
眼見老豆咁樣「跣」自己,阿恆梗係即刻補飛啦:「喂,老豆,唔好亂講嘢啦!係咪影相呀?企好啲啦!」
阿恆個老母都幫手打圓場:「係囉!哎…你老豆真係呢…佢好鍾意講笑㗎!」
阿恆老豆:「屌!驚咩呀?男人大丈夫,唔會介意呢啲嘢,做大事㗎嘛!工作就一定有磨擦㗎喇,最緊要好好做,畀心機做,阿恆你知唔知呀?男人要養家,要吃得苦……」
好在Admin出口話幫手揸機,打斷咗阿恆老豆嘅「演講環節」。
後來有位唔知係邊個同事嘅阿媽走嚟同我哋傾計。
不知名阿媽:「你哋公司好大好靚喎!」
「Ok啦!呢棟大廈都幾新,呢度都係新裝修。」
不知名阿媽:「你哋幾錢人工呀?」
「吓?」
不知名阿媽:「我個女話呢度人工好低,會唔會老闆唔鍾意佢呀?麻煩你哋照顧佢,一齊做嘢守望相助吖嘛!」
「哦,會㗎喇,呢度啲同事都好好㗎,唔使擔心呀伯母!」
不知名阿媽:「咁你哋即係幾錢人工呀?」
「……」
正當我哋無言以對嘅時候,佢個女終於嚟喇,原來係會計阿姐個阿媽…你個女人工點會低呀?我哋就低!係咪你個女報細數想畀少啲家用咋!
最誇張係有個同事嘅屋企人偷茶包……其實又唔應該用個「偷」字,可能老人家唔知啲茶包唔係畀人咁樣拎啫。有人見到佢哋打開啲pantry櫃周圍睇,跟住將幾盒未開嘅車仔香片茶包擺落自己帶嚟嘅環保袋,點解我會覺得可能係誤會呢,因為個環保袋係冇拉鏈,期間呢位老人家喺office行嚟行去,好容易見到佢個袋有幾盒茶包。
不過Open Day之後一日都有人同返個同事講,話佢屋企人拎咗pantry櫃啲嘢,唉,總之要講出口就大家都尷尬,聽講嗰位同事想幫屋企人畀返錢,但係Admin話唔知點計所以冇收,都係嗰句啦,尷囉!
又唔係個個同事嘅屋企人都「搞事」嘅,其他人啲親戚父母都好正常,好似我個Department Head咁,佢爸爸做生意,行出嚟個款真係唔同啲,佢媽媽直情有啲貴氣,買埋生果同西餅上嚟請大家食,仲一早講明只係嚟參觀office,之後唔會出席lunch buffet,應該純粹撐下個仔。
另外有個女同事就叫細佬嚟,呢個驚喜呀!原來佢細佬喺前大台藝員,唔怪得咁熟口面啦,有啲同事仲走去R合照集郵,老細都唔執輸影埋一份。
不過我諗老細之後都唔會再搞Open Day㗎喇,因為阿恆老豆係咁「搞事」,食lunch buffet嗰陣當住咁多人面前畀利是老細,而家幾多月呀?畀利是?
阿恆老豆:「你收咗佢啦!」
老細:「唔好唔好,唔好搞呢啲。」
阿恆老豆:「你係我個仔老細啫,但我年紀大過你,我都係你長輩,意思意思,你一定要收!」
老細:「唔需要喇,你自己買嘢食啦!」
阿恆老豆:「買咩食吖!你好好地睇住我個仔,畀啲機會佢!佢係蠢咋,不過擔屎唔偷食㗎!」
我見阿恆都有出手勸阻自己老豆,但係畀佢老豆屌返轉頭,慘呀慘呀,開放日變咗大頭佛,唔知佢兩父子當晚返到屋企會點呢?
其實Open Day前幾日仲有段小插曲,話說有個部門嘅阿姐向同事施壓,係咁叫班下屬一定要帶父母出席,可能捽得勁得滯,導致其中一個同事大聲發爛渣,連我哋坐隔籬department都聽到佢講:「我父母一早唔喺度喇,點叫呀?我細個已經冇老豆,阿媽就兩年前走咗,你唔好再迫我啦!」
聽到佢咁講,office全場靜晒,但你最估唔到嘅係,同日晏晝個阿姐又走去佢個位問:「咁你有冇一個半個親戚可以出席呀?」
嘩!佢阿姐真係冇性㗎喎!結果呢位同事喺Open Day當日直頭請假唔返工。
坦白講,我覺得老細搞Open Day嘅出發點係好,但係牽涉到同事嘅屋企人,特別係老人家,個場面就唔係咁容易控制,而且啲部門主管又會有種競爭意味,見到隔籬department好配合,自己個department就點都要做啲嘢,變相搞著班同事。
或者將來考慮下搞「親子日」同「寵物日」啦!氣氛應該會好好,畫面仲靚啲,希望老細諗諗啦!(完)
《Open Day 上集》
公司搞開放日活動 叫同事帶家人返工:「邊個天才諗出嚟」
https://hkofficedaily.com/?p=26392