「各位同事，公司下個月會搞個Open Day，我哋想請鼎爺嚟煮功夫菜呀，所以麻煩每位同事填一填人數，方便預返個價錢，呢份form要下星期一之前畀返我，希望各位可以踴躍參與！」Admin拍咗3下手引起我哋嘅attention，講完之後又去另一個部門拍3下手再講返同樣嘅對白。
問題係……隻隻字我都聽得明，但係加埋一齊就完全唔知點解，咩Open Day？咩鼎爺？咩報名？然後我個Department Head開始向同事講解：「開放日呀！想你哋邀請老豆老母上嚟office參觀，今朝所有主管開會時已經講過㗎喇，你哋班衰仔快啲填人數啦！」
我：「邀請老豆老母上嚟office參觀？邊個天才諗出嚟？」
Department Head：「細聲啲啦！使唔使畀支咪你？個天才咪就係你老細囉！新年嗰陣提過啦，你唔記得咩？」
我開始有啲印象，事緣幾個月前公司食開年飯，有位同事講起拜年嘅經歷：「我阿媽到而家都唔知我份工做乜，講咗N次係Marketing，佢仲問我咩『停』，後來我費事解釋喇，求其話自己做Sales就算，點知阿媽走去同啲親戚講，拜年嗰陣姑姐問我點解讀完大學要去做售貨員，真係激死！話自己做Marketing佢哋又唔明，話做Sales又以為我做賣衫賣鞋嗰種Sales……」
好衰唔衰，呢位同事嘅說話畀老細聽到。
老細聽完同事嘅經歷之後笑到咔咔聲，跟住淡淡然咁講：「睇嚟要請你阿媽嚟公司一轉先得喎，等佢知道自己個仔份工係做啲乜，一係咁喇，搞個類似Open Day嘅活動，大家請父母上嚟office坐下，老人家見到就放心㗎喇，好似我個女咁吖，佢上年畢業搵咗份工，我都想去佢公司睇下係咩環境。」
搞Open Day請父母上office坐下？我相信任何一個人聽到老細咁講，都肯定會以為佢搞緊爛gag，點估到幾個月後老細無啦啦兌現承諾，佢真係天才嚟喎！大人大姐邊個想帶父母返工呀？同我拍咗拖差唔多半年嘅男朋友都未有機會見家長，我竟然要畀同事見家長？
結果係點？兩星期過去，全公司冇任何同事「報名」邀請父母出席Open Day，好合理吖！與此同時，Admin話搵唔到鼎爺，我唔知佢話搵唔到嘅意思係冇人哋電話吖，抑或係收費貴得滯所以搵唔到，anyway，話之你搵Gordon Ramsay啦！我係絕對唔會帶父母上嚟公司囉唔該！
可能見到反應冷淡，勢色唔對，Admin宣布老細更新咗啲活動細節，首先係唔再拘泥要同事請父母嚟，總之係家族成員就得喇，例如同事想請親兄弟姊妹或者姨媽姑姐都得，其次係將Open Day由一日改成半日，朝早參觀完office，大約12點左右老細就會請晒大家去酒店食lunch buffet……幾好笑喎！真係會貪你呢餐而叫父母、兄弟姊妹，甚至親戚嚟公司？
過咗兩個星期仲係冇同事響應嘅時候，office氣氛已經有啲緊張㗎喇，各個部門主管開始出口術「捽數」，唔係捽公司生意嗰啲數，係捽同事快啲填會帶幾多個親人嚟參觀，一齊聽下我Department Head當時點講。
「幫幫手吖你哋！今朝畀老細問到口啞啞呀！佢問我條team點解冇人參與，嗱！我唔使你哋每個人都帶老豆老母嚟喇，是但搵一兩個同事報名啦！畀個數我，要交差呀！求其搵啲舅父又好，姨丈又好，半日啫，仲有餐免費lunch buffet喎！」
我：「咁你唔叫你老豆老母嚟？你報名咪得囉！」唔係想寸Department Head，只係本能反應驅使我咁問，而佢係迴避冇答我問題。
去到第三個星期，亦即係距離Open Day只剩一個禮拜，公司依然冇同事交人數，睇得出各部門主管愈嚟愈急喇，同事私底下都議論紛紛，無謂吖嘛！做嘢已經夠煩啦，又搞埋呢啲不切實際嘅開放日，平時話帶埋老母返工，意思係做嘢畀人粗口問候，而家個老細真係想你帶埋老母返工，癲得滯囉！
Admin：「各位同事，由於想鼓勵你哋帶屋企人嚟office參觀，而家除咗Open Day會請大家屋企人食lunch buffet之外，公司仲會容許帶屋企人出席嘅同事放半日假，即係嗰日食完buffet可以走得，係咪好吸引先？咁快啲報數喇你哋！呢個活動嘅宗旨係想同事嘅親人知你哋做緊咩工作，了解多啲我哋公司，好有意義㗎！」
有個同事舉手發問：「吓！咁如果全公司同事都帶屋企人嚟Open Day，咪全公司放半日假囉！冇人喺公司得唔得㗎？」
你唔好問啦！你自己係咪帶先？
點知Admin又真係答佢：「係呀！如果全部同事帶，就全公司放半日假，講咗就係㗎喇，快啲填名填人數啦！」
我唔知係放半日假太吸引，定係各部門主管真係畀到壓力班同事，開始陸陸續續有人交名喇，呢個部門一個，嗰個部門兩個，而我Department Head亦真係叫咗自己老豆老母嚟，嗱！呢啲咪叫以身作則囉！不過我都係唔會帶㗎，等睇大家表演。
終於嚟到Open Day嘅日子，與其叫開放日，不如叫災難日，因為呢班「親人」嘅言行舉止好正……（未完待續）