出嚟社會做嘢，只要夠勤力，做嘢有交帶，唔好怕蝕底，唔好同人計較……咁公司裡面所有麻煩事同埋豬頭骨，全部都會屬於你。
我喺公司嘅處境就係咁，上司Gordon一清二楚，因為佢有時都叫唔郁嗰幾個老屎忽做嘢，所以我年中捱義氣幫Gordon啃唔少豬頭骨，慶幸佢冇忘記。
「我可唔可以收返封辭職信呀？」喺Gordon同我兩個人食farewell lunch嘅時候，我決定搏一搏。
Gordon：「咩事？」
「Liam間公司hold住咗個position……」
Gordon：「你哋冇簽約㗎咩？」
「冇啦，我都唔知口頭承諾計唔計？就算計又點，迫到佢一定要請我，大家都係唔開心，不過我純粹問下，都知道封信去咗HR嗰度，同事又通晒天，唉。」
Gordon：「我返去同HR講下，好小事啫，又未請人，有得救嘅。」
喺Gordon嘅幫忙之下，封辭職信當冇事發生過，最難受反而係同事間嘅閒言閒語，其實我預咗，不過Gordon好識做，特登喺一個內部meeting上面向其他人講：「我好辛苦先留得住Larry，以後一切照舊。」
因為公事關係，我同Liam仍然會接觸，初時難免尷尷尬尬，我多少有啲埋怨嘅情緒，而佢亦講到明好愧疚，咁又可以點，兩個麻甩佬唔通嬲嚟嬲去咩。
我曾經畀過說話Liam聽，exactly嘅wording唔記得，大致係話好在Gordon有情有義，唔似佢阿頭Benson咁不負責任，五時花六時變差啲累到人連份工都冇埋。我諗呢種尷尬關係維持咗半年，之後總算釋懷，大家亦接近去返嗰件事之前咁樣，工作以外會講下笑。
2019年，我嘅加薪幅度維持返舊水平……加$500，唔知點解嗰一刻冇埋怨，反而有少少感恩，就好似曾經背叛想出走，但公司畀我食回頭草仲有人工加，而Turn Down Offer事件亦搞到我有種「一朝被蛇咬，十年怕草繩」嘅心態，真係唔敢再搞咁多嘢。
曾經將呢件事同屋企人講，你知老人家肯定會叫啲仔女唔好成日轉工，特別係發生過呢單嘢，我老竇更加叮囑我要坐定定，好好報答上司知遇之恩。
其實我都係咁諗，所以留低之後更加畀心機做嘢，比之前更勤力，更有交帶，更唔怕蝕底，更唔同人計較，當然麻煩嘢亦更多，但總好過失業，何況之後嘅日子，大家都知全球進入咗疫情世代，公司連上環間Showroom都執埋，仲不斷傳出會裁員。
2020年，傳聞終於成真，老闆選擇由高薪一族開始裁落去，唔知應該笑好定係喊好，我當時唔喺呢個list入面，因為人工太低，反而Gordon同個別一兩個老屎忽，仲有隔籬department一啲senior被勸退，換言之，Gordon要走……
「你打算點？」
Gordon：「冇咩點，反正老婆呢幾年係咁叫我同佢返英國，咁咪返囉。」
「如果你走，我都想走。」
Gordon：「唔使因為我而走喎，出面咁難搵工，做住先啦！」
2020年11月，Gordon離開公司，舉家出發去英國，我非常唔捨得，但公司情況愈嚟愈差，2021年初，我自身難保，因為老闆連我都裁埋，哈，經過咁多事同埋波折，結局都係殊途同歸。
臨走之前一個月，我陸續同公司嘅客仲有supplier道別，打去畀Liam嘅時候，佢話自己公司請緊人，問我試唔試？
「唔好玩啦，見過鬼仲唔怕黑咩！」
Liam：「其實我個心仲係好唔舒服，過去咗嘅事唔好提啦！」
「唔喇。」
Liam：「唔係呀，如果你當時去我公司做，而家就唔會失業，你畀我幫返你啦！」
其實我唔想，由始至終都覺得Benson當時有玩我嘅成份，但係Liam鍥而不捨，仲話唔上佢公司見工都冇所謂，最緊要出嚟等佢請我食飯。
我哋冇食飯，但約咗出嚟飲咖啡，Liam依然不斷邀請我去佢公司做，我亦再三拒絕。
Liam：「講件事畀你聽。」
「咩事？」
Liam：「當日係你大佬Gordon唔畀我哋請你。」
「痴線！點樣可以指揮你哋唔請一個人。」
Liam：「你大佬打畀Benson，話撬客嘅staff唔啱行規。」
「乜我哋呢行有啲咁嘅行規㗎咩？」
Liam：「理論上係冇，不過你睇下先。」Liam遞咗佢部電話畀我，係幾幅screen capture，佢叫我自己逐張睇，打橫掃仲有幾幅。
我見到Gordon嘅WhatsApp，當中嘅文字內容係半威脅如果佢哋請我，會同行家唱佢哋，並且會減少同佢哋拎貨。
Liam：「係你大佬喝停Benson，呢堆cap圖係Benson當時畀我睇，仲有voice msg，Benson forward埋畀我，你聽下。」
我唔敢相信，仲覺得佢哋係換張profile picture扮Gordon，但諗真啲，我係邊個？點會值得Liam同Benson造假搞一大堆嘢去呃我？
Liam拎返部電話，早有準備咁play返Gordon嘅voice msg，冇錯，我認得係Gordon把聲，個voice msg係咁講：「Benson，大家work咗咁耐，無謂要我難做啦，Larry好幫得我手，佢走咗公司好麻煩，你出去搵其他人啦！」完全係Gordon嘅語氣，聽落冇火，但又迫緊你去做一啲嘢，係佢嘅style。
「仆街！」
Liam：「仲有幾段voice msg，畀你聽埋。」
「唔使喇。」
Liam：「Benson嘅立場係好難做，有個客咁樣同佢講，真係好難用公司生意同名譽去搏，但我想話你知，其實當時已經係confirm咗offer，Benson仲話你個expected salary填得太低，on top再加咗，佢唔係你想像中咁衰，但真係身不由己，我哋想同你解釋好耐，而家Gordon直情離開香港，我覺得係時候講。」
「其實我仲係唔認同，出嚟做嘢講信用，唔係小朋友玩泥沙，如果我當時唔係叫Gordon畀我留低，係自己收埋唔出聲，然後選擇失業都唔食回頭草呢？」
Liam：「我同Benson都覺得，你只係開聲開得早，如果你唔出聲話留低，Gordon就會主動挽留你，因為佢根本知道我哋呢邊會放棄請你。」
呢啲係咪人性嘅陰暗面，好恐怖。
「點都好，多謝你同我講，不過我都唔會過嚟做，我覺得Benson始終有責任，換轉係我，答應咗人話請就一定要請，可能立場唔同，但希望有一日我做人阿頭之後，自己唔會變成咁。Anyway，知道你一直都係幫我，Thank you！」
同Liam say完bye，我直接用WhatsApp voice msg畀Gordon：「多謝你喎，原來係你當時block住人哋間公司請我，仲要一直扮好人，我啱啱見咗Liam，知道晒。」
時差關係，我等咗足足大半日先見到msg轉藍剔，即係代表佢聽咗，又再等多半日，Gordon先至覆我msg，佢冇voice msg，反而係打字，寫住：「你好幫得我手，我梗係想你留低，如果當時Benson堅持請你，我要阻都阻唔到，係咪先？」
我對Gordon好失望，一直以嚟好尊重呢位上司，我以為佢喺事業上幫我一把，又以為佢幫我保住份工，但原來係喺背後插我一刀，最令人心寒嘅係，佢完全唔覺得自己有錯。
我已經冷靜唔到，冇可能打字，所以又再voice msg佢：「我喺公司做咁多嘢，唔怕蝕底，係因為我有責任感，我冇諗過一個人有責任感反而成為自己嘅絆腳石，你知道得我一個肯做嘢，所以就用呢種方法令我留低，你會唔會覺得自己好自私。」
Gordon覆嘅msg依然係避重就輕，佢只係打咗一句：「你要咁諗我都冇辦法，咁激動無謂講落去。」
再send msg過去，發現佢已經block咗我。
我真係好嬲，覺得自己好死蠢，但冇人可以傾訴，呢件事鬱住喺心好唔舒服，記得睇過一段句子：「世上有兩樣東西不可直視，一是太陽，二是人心。」當時唔明，而家明。
啱啱返咗新工，適應緊，唔知過唔過到試用期，但係我學識幾件事，第一，轉工唔好咁快同人透露去向，第二，有新offer一定要簽咗contract先作準，特別係本身有份工要辭職嘅狀態之下。
第三，人心不可直視。
Good luck to me!
＝＝＝＝＝