大家瞓覺前會唔會將電話轉去「請勿打擾」模式㗎？我咁耐以嚟都唔習慣咁做，一來自己唔算醒瞓嘅人，二來冇乜friend會癲過我呢隻夜貓，半夜我唔msg畀人都偷笑，但自從公司嚟咗個新同事之後，一切都有所改變，唔止我，就連老細都受到影響。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
公司個新人叫Joan，老實講，佢啱啱入嚟做嘅時候獲得一致好評，原因係Joan做嘢有交帶，主動，而且每件事都好上心，經理同老細仲點名話Joan非常幫得手，鬼咩，做咗一個月唔夠已經朝朝返8:30，晚晚OT到唔願走，喺管理層嘅立場嚟講梗係鍾意啦！
開頭大家都覺得Joan係因為未過試用期先至咁搏，後來先知唔係咁簡單，以上嘅優點都要修改一下字眼，應該係「太過有交帶」、「主動得滯」、「上心到有啲病態」，原因唔關試用期事，Joan個格真係咁。
有次半夜兩點幾，我啱啱先煲完劇上床準備就寢，電話連續傳嚟4, 5次響聲，係WhatsApp有訊息嘅提示，咁咪睇下囉，原來Joan匯報緊工作上嘅嘢，唔止匯報咁簡單呀，佢仲列咗一啲問題出嚟tag相關嘅同事去解答。
當時我心諗：條女咩料呀？搏升呀？
因為呢個係公司group，除咗茶水阿姐之外，真係全部人都喺晒度，包括管理層同老細，嗰陣我又唔熟Joan，你好難怪我覺得呢個新人搏上位。
隔咗15分鐘都冇任何同事回覆，咁我就放心喇！講真呢個鐘數正常都瞓咗，未瞓亦唔會覆你，雖然我打幾句就可以解答Joan嘅問題，但我冇reply，唔係想留難新人，而係凌晨兩點幾就快三點呀大姐，上唔上位唔重要，我唔想嘈親同事犯眾憎咋！
第二朝起身刷完牙換完衫，我又聽到WhatsApp有msg，嗰陣先至7:40，Joan你唔係咁癲呀？哦！原來我上司覆Joan，佢應該啱啱起身見到msg就reply，不過幾分鐘後，Joan又send msg去個群組裡面，除咗講唔該之外，又問咗兩條新問題，乜Joan你真係咁癲呀？
Joan半夜send msg講公事同埋問問題嘅情況持續，每星期梗有兩三晚係咁，而且send msg出嚟嘅時間仲愈嚟愈夜……呀，應該係愈嚟愈早先啱，凌晨3點幾試過，凌晨4, 5點又試過，有一次係5:50，差10分鐘就6點，個天已經光光地，究竟Joan係較鬧鐘去晨運定係冇瞓過呢？
後來我哋上司叫Joan唔使咁緊張，有咩可以第二日返公司先問，放鬆啲早啲休息。上司嘅語氣同態度都好nice嘅，Joan開頭有聽㗎，不過冇幾耐之後就故態復萌，同事並冇投訴半夜收到msg，但係……有個客投訴，冇錯，係客！
個客向我哋投訴受到Joan疲勞轟炸，事緣有張order個客仲考慮緊，但Joan喺3日內打咗38個電話畀佢，即係平均一日十幾個啦，時間覆蓋早午晚，晚嘅意思係office hour以外嘅私人時間。
客：「我同緊朋友食飯都收到你同事嘅奪命追魂call，欠你哋公司錢咩？我係客嚟㗎！佢仲要send WhatsApp畀說話我聽，唔係咁樣做生意呀？我cap畀你睇，凌晨5點鐘收到咁嘅msg，你話嬲唔嬲？佢直頭嘈醒埋我老婆呀！」
Joan嘅msg係咁樣打畀個客：「顧生，你問我哋拎完份報價又遲遲未決定，究竟想點㗎？我哋唔可以一直hold住個價畀你㗎喇，呢個係3月嘅價錢，好快就會有新訂價，你都知啲原材料唔同咗啦！唔好要我哋公司難做好唔好？」
有冇可能咁樣同個客講嘢呀？就算係心嗰句，你都唔應該講出嚟，更何況呢個客係ok㗎，regular client，你無須要用呢啲字眼同語氣喎！無論你做邊行都好，一定唔會即報即confirm㗎啦，你去舖頭買件一百幾十嘅衫都可能會兜個圈或者返屋企諗諗先，幾廿萬嘅單你期望佢兩三日confirm？仲要凌晨5點幾msg過去？
最後個客雖然有confirm order，不過我上司其實做咗好多嘢，包括打畀個客say sorry，凌晨追單加上38個追魂call喎，唔講以為我哋公司係做倫敦金或者層壓式銷售。
上司同老細亦分別搵過Joan傾，仍是老調子啦！傾完之後係正常咗，不過幾日後又係凌晨一堆WhatsApp，仲發展到唔止同客嘈，同其他部門同事都頻頻開火，因為Joan無論追人哋文件又好，追會計部claim錢都好，一樣習慣用疲勞轟炸咁對人。
會計部個妹妹就講過：「你哋可唔可以話下佢呀，有啲公司一個月先claim一次錢，我哋好好啦，每星期claim返錢畀大家，個Joan真係一日都等唔到，claim張68蚊嘅單走咗嚟追十幾次，我都有其他嘢做，我都好大壓力㗎！淨係服侍你一個人咩！」
上司咁樣安慰會計部個妹妹：「唔使勞氣喎！Joan一視同仁㗎！68蚊又係咁追，幾廿萬張單又係咁追，連工作上有問題都連環狙擊咁對我哋，佢冇雙重標準㗎！」
聽聞當Joan即將過試用期之後，上司曾經詢問老細意見，而老細就話自己都畀Joan嘅夜半msg困擾，迫於無奈之下轉咗用 「請勿打擾」模式，因為就算自己唔會被嘈醒，佢老婆都無覺好瞓，老細仲試過畀老婆質問出面係咪有女人，因為以前都唔會三更半夜keep住有msg響。
另外，Joan每日行入老細房最少2次，每次又問嘢又畀意見，老細：「次次Joan都話講兩句，但佢所謂講兩句就最少都半個鐘，結咗婚十幾年，第一次覺得自己老婆原來都唔係咁煩，我老婆比起Joan真係差太遠。」
上司亦回應：「我仲大鑊，話晒係直屬上司，Joan每日捉住我講一大輪公事，好多嘢仲會追返我轉頭，我有時會有種錯覺，好似Joan先係Manager，而我係跟佢，佢頭先又追我拎返份report喇，本身我習慣逢星期一先send出嚟，而家畀佢追到甩褲，咁樣……Joan個試用期你點睇？」
老細：「講又同Joan講過喇，嗌咗佢唔使咁緊張都唔聽，不過佢勤力到咁，唔通炒佢咩，照過啦！」（未完待續）
【職場信箱】最唔尊重求職者行為，CV掉垃圾桶、見工見到失蹤、食住煙interview乜都齊！
