Yumi真係不斷挑戰我嘅底線，從交友App帶唔同男人返嚟搞嘢，再去到帶同事返屋企過夜，最新就係同我個Manager搞埋，喂你哋要啪啪啪咪死出去囉，開間房兩三個鐘幾多錢呀？Manager份糧唔係唔夠比呀？有冇人想見到自己嘅team head係屋企出現先，你兩個唔尷尬我都尷尬啦！
我：「其實你知唔知我個Manager結咗婚㗎？有兩個小朋友添喎！你唔好話我知佢離咗婚呀，條友個枱頭仲擺晒老婆仔女啲相，咁究竟你係做後母定係第三者？認真定係One Night Stand？而家得我同你兩個，有咩講清楚喇！」
Yumi：「玩下之嘛，做人世咩？佢結咗婚關我咩事啫？」
我：「你不嬲都係咁濫？」
Yumi：「都話玩下，如果你一開始就話唔可以帶人返嚟，咁咪一早講囉，你都可以帶男仔返屋企㗎，我唔介意㗎喎！你冇之嘛！」
我：「其實我唔介意你帶男朋友返嚟，但可唔可以係固定同埋正經？你個個禮拜換畫，係咁有陌生男人出入屋企，我好唔自在㗎！」
Yumi：「點樣陌生呀又？Johnny同阿Greg（我個manager）你都識㗎啦！」
根本Yumi就係曲解我嘅意思，所以講唔到落去，我哋喺屋企已經變成互不理睬，連返工都唔會約埋一齊，名符其實係同屋主，完全冇感情，好似唔識一樣。
講完條底線，就輪到講下條底褲，唔知係有心定無意，自從我哋關係轉差之後，Yumi喺屋企就愈嚟愈冇手尾，最經典係有條洗完嘅底褲放喺廁所洗手盤側邊，第一日我算數，當睇唔到，更加唔會幫佢執，點知第二日第三日仲喺度，我真係想講下，Yumi自己都有用呢個廁所，日日都喺個洗手盤前面刷牙，冇理由見唔到囉！
條底褲由濕擺到乾，我終於忍唔住出聲話佢，Yumi唔出聲走入去拎走條底褲，乜都冇講，呢個就係我同佢後期日常生活嘅慣常場景。
食完嘢唔洗碗，用完嘢唔執返，永遠唔會幫手做任何一樣家務，Yumi真係完全進入放棄間屋嘅狀態，怪就怪大家合租嘅時候冇傾過點樣分工，其實初時佢係好識做，例如我煮嘢食就佢洗碗，我掃地佢就洗衫，不過自從嘈完帶男人返屋企嘅問題之後，所有嘢都變晒。
要數最過份嘅一次，就係我去廚房打開垃圾筒嘅時候，見到兩個condom喺最上面，冇錯condom係好正常嘅嘢，但係間屋我有份住㗎，莫講話我唔知邊個係condom嘅主人，就算知道都好核突啦！諗起仲有機會係我個manager，突然有種作嘔嘅感覺。
我都未嚟得切嘈佢，已經畀Yumi殺個措手不及。
Yumi：「我要搬，月尾搬走。」
我：「租約一年生一年死喎，而家一年都未夠。」
Yumi：「咁都冇辦法㗎，我搵到新工，遞埋信，下個月返長沙灣，冇理由繼續住呢度啦，都唔就腳，真係貪個獅子山景咩？」
我：「我唔理你份新工喺邊啦，提早解約要賠錢㗎，萬幾蚊租我一個人點租得起呀？」
Yumi：「總之我唔會再喺度住，我條仔住昇悅居，行過對面馬路就係新公司，我會搬埋過去，嗰度我連租都唔使交，換轉係你都唔會繼續呢度啦！」
我：「我會，因為我唔會丟低個friend，要佢一個人孭晒成份租，起碼都等埋生約過咗先，你而家毫無先兆喎！」
Yumi：「你同個業主傾啦，總之我唔會租，都冇錢畀。」
我最蠢嘅係搵錯室友，當時簽租約仲要係我個名去搞，連上期按金都係我出住先，因為Yumi話佢唔夠錢，咁我諗住大家一齊住落去都冇所謂啦，第日唔住佢咪夾返畀我囉，點估到Yumi會咁不負責任。
咁我又可以點啫？潑婦罵街唔畀佢走？更何況佢搬走其實我係開心，只係估唔到佢突然咁做，搞到所有嘢都失晒預算，仲連最基本嘅一年死約都履行唔到，完全唔理我嘅財政環境同埋感受，有段時間我日日望住個獅子山景真係抑鬱。
「想問你知唔知Yumi點解唔做呀？」我個manager無端端問我Yumi嘅事。
我：「唔知，你自己問佢啦！」
「你同佢一齊住，佢冇提過咩？」
我：「我哋已經唔係一齊住。」
一個已婚男上司向我追問Yumi嘅下落，好心你唔好咁癲啦！人哋當你係汁男咋，你唔係打算拋妻棄子同個小妹妹一齊呀？
後來有個女仔friend知道咗呢件事，曾經提出捱義氣同我夾份租，不過自從Yumi嘅不愉快經歷之後，我發覺同朋友夾份租屋絕對唔係一件簡單嘅事，簡直係友情大考驗，如果我唔想冇咗個friend，最好都係保持適當距離，所以我拒絕咗，幸運嘅係業主好明白事理，肯無條件畀我提早解約，最後嗰個月仲畀我用按金扣，真係不幸中之大幸。
而家我搬返屋企住喇，相信結婚之前都唔會再搬出去，除非有能力自己一個租晒成層樓，我諗呢啲就係叫做見過鬼會怕黑。