丈夫唔止對櫻進行家暴，對個仔亦都有暴力行為，試過用煙頭焫個仔，櫻因為咁樣而帶個小朋友離家出走。二宮先生話：「佢哋當時暫住一個親戚屋企，但係嗰個親戚收容咗櫻幾日已經覺得好麻煩所以叫佢走，然後櫻第二次出到嚟就問我想唔想一齊生活。」
同事：「見過你兩次咋喎，其實我唔明點解佢唔正正經經搵份工，便利店、餐廳、工場，甚至係清潔，想返工總可以搵到，同埋點解唔搵啲政府機構幫忙呢？日本應該係一個福利制度好完善嘅國家。」
二宮先生：「櫻嘅顧慮有好多，搵機構幫忙除咗擔心個仔受到白眼之外，仲會擔心相關部門會介入，然後接走小朋友去安置中心，佢唔想同個仔分開，至於搵工嘅問題，由於冇人照顧個仔，東京就只有嗰一位親戚，交畀出面嘅人照顧又要另外用錢，而櫻當時嘅狀況係連電話費都欠交，就快被終止服務。」
我：「咁佢第二次見你嘅時候，邊個睇住個仔？」
二宮先生：「佢帶埋個仔出嚟同我食飯，仲喺個仔面前提議去酒店，不過佢個仔好細個，應該唔知我哋講緊乜，但係太沉重喇，我請咗佢兩母子食飯，另外畀咗3萬円佢，可以做嘅就係咁多，你知唔知道淨係東京有幾多單親媽媽？我冇可能全部拯救。」
第二次見面之後再隔幾日，二宮先生收到櫻嘅訊息，對方話喺一間餐廳搵到侍應工作，親戚答應畀佢住多一個月，二宮先生祝福櫻早日重過新生活，以為事情總算喺有限度嘅時間內圓滿解決，點知再隔兩日，二宮先生又收到櫻嘅短訊，佢仲畀個內容我哋睇：
「二宮先生，想問下如果辭職後唔交還制服，餐廳會報警嗎？」
二宮：「點解你唔做？唔做又點解唔畀返制服人哋？」
「我冇正式辭職，我冇返去，所以制服仍然喺我度，請問我冇交還制服，店家會報警嗎？會連累我老公嗎？」
二宮：「你仲擔心連累你老公？佢咁樣對你同埋個仔。」
「佢叫我返屋企，我選擇原諒佢，希望今次唔會好似以前咁樣。」
二宮話自己雖然唔會同櫻一齊，亦唔會為櫻嘅人生負上任何責任，但聽得到櫻已經唔係第一次離家出走，亦唔係第一次再返到家暴老公嘅身邊，呢個循環不斷延續，最擔心係個小朋友。
二宮：「櫻，你用宅急便之類嘅服務，將制服送返去畀餐廳啦，你都係唔想面對餐廳老闆啫。」
「好的，二宮先生，你想去酒店嗎？我丈夫工作受傷，暫時失業，我手頭上嘅錢唔知點樣應付三個人嘅生活，你要我做咩都可以，木曜日你有空嗎？」(註：木曜日即係星期四）
然後二宮先生決定……封鎖咗櫻嘅Line，從此唔再介入亦唔想再聽到櫻嘅任何留言。
同事：「好似好慘，又好似唔抵可憐。」
二宮先生：「邊啲真係慘，邊啲係虛構故事，我已經唔識分，亦唔需要去分，對櫻嚟講，佢丈夫係惡魔，但係對小朋友嚟講，櫻呢個媽媽都係惡魔，我玩『パパ活』已經一段時間，乜嘢人都見過，自此之後就唔再同23歲以上嘅女性約會，30歲以上更加唔會，因為去到呢個年紀仲利用『パパ活』搵男人，好大機會都係單親媽媽。」
註：二宮先生表示自己唔再同呢個歲數嘅女人約會，係表示緊『パパ活』網站上嘅女人，而唔係現實生活中認識嘅女人。
二宮先生話佢之後再喺『パパ活』網站上同過幾位年齡介乎18至22歲嘅少女出嚟，有啲人連作故事都破綻百出，第一次出嚟話想搵學費，第二次出嚟就話屋企有人病重。
同事忽然問我：「歡場無真愛日文可以點表達？」
我：「鳩知咩！唔使講啲咁深嘅嘢喎！」
二宮先生繼續講：「有一次，我約咗個19歲嘅女仔喺新宿見面飲咖啡，我畀1萬円佢，唔係一張1萬円，而係10張一千円，見面去到咁上下，佢話要趕住返兼職，我見仲有時間就自己周圍行，由新宿行到東新宿，因為我食煙，所以去咗一間叫THE SMOKIST COFFEE嘅店再叫杯咖啡食下煙，竟然咁巧合畀我見到頭先個19歲女仔。」
同事：「佢喺呢間店返兼職？」
二宮先生：「唔係，佢同二男一女一齊，嗰兩個男仔同佢差唔多年紀，一頭金髮，徹頭徹尾就係不良少年，佢哋傾計嘅聲音好大，旁若無人，個女仔講嘢好大聲，比起同我見面時嘅溫柔形象差好遠。」
我：「你哋有冇打招呼？」
二宮先生：「THE SMOKIST COFFEE吸煙嗰層係長走廊，佢哋坐近廁所，我後來先到，個女仔係背住走廊，我認到佢側面同埋裝束，然後靜靜地坐另一邊樓梯觀察，由於佢哋講嘢好大聲，我坐到咁遠都聽到佢哋傾啲學弟學妹嘅事，應該全部係同一間學校，我仲見到個女仔將一疊一千円畀個不良少年，相信就係我畀佢嘅錢。」
可能呢啲就係所講嘅集團式經營，不過二宮先生話唔會理咁多，佢玩『パパ活』就係想買少女嘅青春，而且二宮先生話自己已經有條方程式，就係第一次先飲嘢見真人，最低消費1萬円，然後就會表明下次出嚟要去酒店，如果對方吊高嚟賣要飲多幾次嘢先肯做「大人嘅事」，咁二宮先生就會果斷放棄。
二宮先生：「如果淨係飲嘢，大把人同我飲啦，我去搵後生女唔係要飲嘢，我讀書嗰陣冇拍拖，因為太專注學業，大個之後見到啲後生仔女著住校服談戀愛，我會覺得好羨慕，原來已經錯過咗最青春同最寶貴嘅年紀。」
好想問二宮先生係咪睇完《First Love》先有呢種感覺，不過諗真啲又唔係吖，《First Love》最近先上，佢玩『パパ活』都玩咗兩年，時序上佢搵初戀係早過佐藤健🙈
二宮先生：「每個喺『パパ活』網站上面認識嘅女仔，我最多只會同佢一齊一個月至三個月，跟住就會換。」
嘩！咁反高潮嘅？之前仲幫緊單親媽媽，跟住就話自己一至三個月換一次後生女。
同事：「咁伊藤小姐呢？我見佢唔似不良少女喎！仲喺BIG ECHO做兼職，頭先你唔係叫佢去你屋企咩？」終於覺得同事問嘅問題有啲建設性。
二宮先生：「邊個知呀？我只係要同後生女一齊嘅感覺，我要佢哋嘅青春同身體，唔係要娶佢做老婆，而伊藤小姐無論背後嘅故事係真係假都好，佢都係想要我啲錢，唔係要我做佢老公，呢個係交易，唔需要投放真感情，佢當初話賺到7萬円就可以辭晒兩份兼職，我畀夠佢雙倍有多，15萬円，最緊要佢做得開心，佢係咪真係喺BIG ECHO做兼職，唔關我事，係咪打算辭晒兩份兼職，我唔想知，係咪真係住喺神奈川，我唔介意，佢以後條路點行，係佢自己嘅選擇，仲有一個月期限，我就會同伊藤小姐講再見，『パパ活』網站每個月都有好多新嘅女仔，亦會有一啲脫離咗呢行，但又會再返嚟做嘅女仔，來來往往，無窮無盡。」
同事：「15萬円！」
二宮先生：「我而家住緊嘅公寓，月租都45萬円，15萬円有個20歲嘅女朋友，我鍾意叫佢著校服又得，著情趣內衣又得，價值遠超過15萬円，最緊要唔好認真。」
雖然45萬円而家兌港元只係HKD 25,000至 HKD 26,000左右，但係呢個租金喺東京已經租到好四正嘅大屋，我喺六本木個office可以坐到8個人有露台都係講緊12萬円，可以想像到二宮先生住緊嘅地方絕對高級，再相對於15萬円有個19歲女仔隨傳隨到，呢條數對佢嚟講真係濕濕碎。
15萬円對你嚟講可能都係濕濕碎，甚至乎你供緊層樓折合日圓都唔止45萬円，但係喺東京呢個五光十色，人人嚮往嘅都市裡面，仍然有人會為1萬円苦苦掙扎，每日去『パパ活』網站釣魚，等待約唔同嘅男性見面，每個地方嘅繁華背後都有你想像唔到嘅貧窮同生活壓力，我哋喺報章同新聞見到嘅只係表面。
晚飯完後，我同同事向二宮先生告別，回程搭車期間同事向我講：「二宮先生用錢買年輕女性嘅肉體同青春，幾個月就拋棄換畫，其實佢都係自己口中所講嘅惡魔。」（完）