同事：「如果飲咖啡只係1萬円……我覺得還可以，試想像我識到女朋友，每次出街可能都唔止1萬円，而且仲可以選擇自己鍾意嘅女性類型，例如伊藤小姐呢種年輕嘅類型，對外國人嚟講其實好吸引，就當交個朋友。」
二宮先生：「近年日本經濟唔好，好多行業已經冇咁排斥外國人，就以『パパ活』為例，唔少人仲特意學習中文，如果淨係接受日本男性顧客相信好難生存，但係1萬円飲咖啡……你諗得太簡單，首先作為男性，註冊『パパ活』網站係有門檻。」
根據二宮先生所講，比較大型嘅『パパ活』網站係需要男會員提供年收證明，再直白啲，唔係阿豬阿狗行埋嚟話自己有錢做「爸爸」，就可以喺網站內隨意搵個女性去「照顧」，如果冇上載糧單，你就只可以睇，唔可以send訊息出去，變相做CD-ROM，要求相當嚴格。
二宮先生：「交友網，男性發訊息畀心儀女性，10個訊息可能只得到一個回覆，你仲要不斷製造話題，不過喺『パパ活』網站，一晚你會收到超過10位女性主動聯絡嘅訊息，開始時我有上載相片做頭像，仲以為自己生得好俊朗，後來做咗個試驗，原來我唔使任何照片做頭像，每晚同樣可以收到好多訊息，嗰啲女仔只想要錢，佢哋唔介意你咩樣，亦唔介意你嘅年齡。」
擁有兩年「實戰經驗」嘅二宮先生表示，佢第一個喺『パパ活』約會嘅女仔叫美紀，19歲，同樣係由1萬円飲嘢開始，雙方互通訊息約定喺銀座嘅EXCELSIOR CAFFE見面，對方衣著普通，但樣貌標緻，同網站上嘅頭像一樣。
美紀透露自己用呢種方法搵錢嘅最大原因，係想開一間瑜珈教室，希望做老闆娘有自己嘅事業，兩人飲完咖啡之後就正式交換Line聯絡。
二宮先生：「美紀透露自己一路讀大學一路做呢份兼職，不過好奇怪，每次我send訊息畀佢，總係會過一兩日先回，再出嚟飲完第二次咖啡，情況都係一樣，去到我第三次約佢，美紀就話自己呢排支出多咗，飲咖啡嘅津貼想由1萬円改為3萬円。」
同事：「3萬円？即係港幣$1700蚊飲杯嘢？太貴喇，係咪冇得咩咩㗎？3萬円只係飲嘢。」
我一路都冇出聲係因為想流暢地聽故仔，所以我用廣東話同同事講：「不如你收收皮先，畀二宮先生講埋落去。」
二宮先生：「我冇答應美紀，覺得自己真係當對方係女朋友實在太傻，佢應該係需要錢先諗起我。」
同事：「我終於明白援交同『パパ活』嘅分別。」
二宮先生：「援交直接而言係賣春，『パパ活』某程度上只係年長嘅男士向年輕女性提供金錢援助，未必會做大人嘅事，甚至可以完全冇身體接觸。」
然後二宮先生亦會遇到一啲獅子開大口嘅年輕女性，佢話有一位自稱曾經做過ANA空姐嘅22歲女仔，一嚟就話要每月30萬円，仲話可以每個月無限見面同埋無限做「大人嘅事」，不過就需要畀錢先。
我：「30萬円畀一個網上面認識嘅人……」
二宮先生：「我雖然好色，但唔係冇思想，我出嚟社會工作咁多年，有自己公司都好多年，再奇怪同埋再狡猾嘅人都見過，當然冇畀呢筆錢，不過我慢慢發現到，呢班活躍於『パパ活』網站嘅年輕女仔都有幾個共通點，就係約會地點多數揀銀座同新宿，想搵成年男士照顧嘅理由亦包裝得好好，例如想做老闆或者想留學，相信都係集團式，背後被惡魔控制。」
經歷過幾次同後生女嘅約會經驗，二宮先生開始唔再拘泥於年齡，如是者佢同咗一位35歲嘅女士出去，對方叫櫻，同二宮先生之前幾次有啲唔同。
二宮先生：「櫻完全冇叫我去飲咖啡，佢係直接想約去時鐘酒店，開價4萬円，但我自己都驚，又驚係照騙，又驚有其他陷阱，結果我提出都係1萬円飲杯嘢先，適合先至再去時鐘酒店。」
出到嚟之後，二宮先生形容櫻嘅樣貌同埋身形都同『パパ活』網站裡面嘅相有好大落差，不過最大問題都係談吐舉止有啲唔正常。
嗰位叫櫻嘅女人，出到嚟已經介紹自己係一位單親媽媽，仲拎咗好多張單出嚟，包括水費、電費、健康保險……等等，而且全部都係過晒期未交，甚至話已經欠交屋租幾個月。
我：「想你幫佢交晒啲費用？」
二宮先生：「佢又冇咁講，不過就話飲咖啡唔足夠，佢希望可以去酒店，想賺多啲錢，因為生活壓力好大，而且呢幾日已經唔夠錢買食物畀個仔，我聽到之後個心好唔舒服。」
櫻並唔係二宮先生杯茶，所以二宮先生拒絕去酒店，不過櫻就反覆強調自己乜嘢都願意做，即使係變態嘅事都可以。
同事：「變態嘅事係？」
二宮先生：「你想像得到嘅，佢都有提出，例如綑綁，不過我冇咁做，我係出去尋開心，唔係去拯救人，結果我畀咗1萬円佢，同時喺咖啡館叫咗兩份意粉同埋兩份三文治外賣，畀佢帶返去同個仔做晚餐。雖然櫻並唔係我喜歡嘅類型，但係45分鐘嘅飲茶時間裡面，我聽佢講咗好多自己嘅事，包括點樣畀丈夫暴力對待，加上櫻出示咗太多單據，上面全部有佢個名同地址，所有嘢都冇掩飾，比起我之前遇到嘅女仔真誠好多，所以我想喺能力範圍之下，買啲食物畀佢個小朋友。」
本以為二宮先生同櫻嘅故事已經結束，我可以再聽其他嘅奇遇，仲有佢同而家個女朋友伊藤小姐嘅事，點知原來仲未完。
同一晚，二宮先生喺深夜收到櫻嘅Line訊息，內容係想自殺，而且係喺個仔面前自殺，佢懇求再同二宮先生見面，並且問咗句：「二宮先生會想娶我這樣的女人嗎？即使我帶著兒子也不介意嗎？」
二宮先生冇回應，但就擔心櫻真係會做傻事，所以相約兩日後再見面，二宮先生話：「喺日本，每個人嘅表面都好光鮮，不過背後有好多你想像唔到嘅貧窮同埋困局。唔單止櫻，就算係正常在職嘅人都有好多生活壓力，喺呢度有無窮無盡嘅帳單，所得税、住民税、醫療、保險、養老金……」
我：「明，好多人羨慕我搬嚟日本，但係冇人見到背後有幾多帳單要交，每一晚我返屋企開信箱嘅時候，心裡面就會默默講一句：今日又有邊個追數？因為喺日本實在太多太多帳項。我覺得要喺日本生活完全冇問題，但你想喺日本闖一番事業或者賺到一筆大錢，相信係一件好艱難嘅事，呢度太多制肘，太多無形嘅壓力。」
二宮先生：「冇錯，一個月裡面，應該有一半嘅日子都收到帳單之類吧？其實有啲唔係帳單，例如水費，佢正式寄帳單之前，會先寄封信話你知嚟緊要交幾多錢，不過呢封唔係畀你交錢，係畀你睇，再過幾日就會收到正式嘅單，所以感覺上每日信箱都會有不同嘅帳單，總之都係圍繞住要交錢。」
我：「坦白講，我見單交錢，已經交到冇晒感覺，仲未計每個月喺我份糧度自動扣除嘅稅……不過講返櫻先，佢點解唔搵政府同民間嘅援助？」
二宮先生：「因為櫻竟然仲要顧慮埋社會嘅眼光。」
同事：「所以……第二次見面，你有幫櫻繳付所有嘅帳單嗎？」
二宮先生：「冇，我教佢點樣去搵援助，幫佢填表格，仲嘗試介紹工作畀櫻，身份上由佢嘅客變成社工，但原來一切都諗得太簡單，事情遠遠比我想像中困難同埋複雜。」（未完待續）