究竟班下屬有幾黑仔，先至會搵工搵到份resume去咗個上司度呢？又究竟班下屬有幾幸運，先至會發生呢件事又冇驚動HR同老細呢？係咪唔明我講乜？正常嘅，正如我都唔明點解公司請人會收返自己班下屬份resume……
留意返個數量詞，係「班」，唔係「個」，我條team有6個人，我係收晒6個下屬份resume，而且係一次過send晒嚟，負責穿針引線嘅係一位headhunter，佢仲好自豪咁同我講：「幫你搵到幾隻fit馬，梗有一個啱你，全team人撬晒過嚟都得！」
仲係聽到一頭霧水係咪？由頭開始講起，我自己都係一個月前入嚟呢間公司做Project Manager，因為入咗嚟幾日已經有一個叫阿Sun嘅下屬遞信，佢直情skip咗我直接遞去人事部，所以我個部門就要請人填補返呢個空缺。
由於我希望呢個replacement可以盡快落實，所以就叫人事部出招聘廣告，不過負責請人嗰位HR就同我講：「用headhunt啦，今年仲有budget未用晒，我哋用唔晒下年就會cut，直接搵headhunt你有冇問題？」
我：「梗係冇問題㗎，最緊要係盡快請到人。」
HR：「Good！同埋我下星期放大假，如果用求職網站請人，啲resume飛晒去我email，到時都幫唔到你睇，我而家叫個headhunt搵人先，然後留你contact畀佢，有啱嘅resume你就直接叫個headhunt約上嚟interview啦，不過入職手續都要等埋我放假返嚟先搞喎，你唔好見完就叫人第二日返工呀！」
我：「咁你放幾耐呀？」
HR：「唔計星期六日，我都係放8日之嘛，你見得嚟都差唔多啦！」
是但啦！反正我都冇得揀，其實我以前請人就好爽快嘅，見啱就請，做同事啫，對襯家咩！如是者，HR就將我嘅email同直線畀咗個headhunt，叫我覺得適合就約上嚟見工，成個過程係唔經人事部，最後落實先會同返個HR夾。
呢位headhunt第一轉就畀咗3份resume我，其中一份仲大大力推介，佢話個candidate而家做緊份工嘅job details幾乎同我公司要求一模一樣，連expected salary都match到，不斷重複住一句：「呢個一定要見呀！」
如果大家有搵過headhunt請人，應該大約知道佢哋嘅流程，最初通常唔會畀你知道candidate嘅全名，每間agency嘅手法同style都唔同，有啲可能畀個英文名你，例如Tom，但就唔畀個姓，有啲淨係畀姓，唔畀名，仲有啲淨係提供一組number，例如120233456，連名都冇。
Headhunt咁做我係理解嘅，因為有啲客唔守規矩，見到份resume覺得適合，跟住就自己上LinkedIn撬人，想慳返筆佣金，所以headhunt咁做純粹想保障自己。
嗰位headhunt強調「一定要見」嘅candidate叫Joyce，雖然冇提供姓氏，但我終於明白點解個job details會咁match，因為呢個Joyce而家做緊間公司咪即係我公司囉！
其實係咁嘅，我公司係叫XXX group，旗下就有幾條支線，幾條支線都用唔同嘅公司名，怕大家混淆所以舉個例，你大約可以想像係亞洲國際飲食集團，佢旗下有意樂、牛奶冰室、CHICKEN FACTORY……我唔肯定佢哋係咪各自有商業登記，又或者共用定分開人事部，但點講都係同一個group。
出招聘廣告請人，假設牛奶冰室有自己BR，佢可以就咁開個牌頭叫牛奶冰室，又或者總公司用亞洲國際飲食集團嘅名義出廣告，香港有咁多集團同企業，例子多不勝數，headhunt只要做足功課就可以避免呢啲低級錯誤，咁樣講會唔會清晰啲？
我哋公司冇飲食集團咁出名，但係旗下就有幾條支線，嗰位Joyce嘅resume當然fit啦，描述而家份工嘅job details直頭一模一樣，一望間公司名我就知出事，喂！我哋同group㗎喎！
其實Joyce冇做錯，可能係HR搵佢嘅時候冇講清楚公司架構同背景，但如果headhunt肯用少少時間click開我哋個official website，基本上你喺網頁嘅第一版嘅底部已經可以見到，咁就唔會send錯resume，搞到Joyce嘅身份曝光。
因為我同呢個headhunt唔熟，亦唔知HR係咪同佢work開，個HR又放緊大假呢，如果我直接同個headhunt講Joyce係我哋員工，一陣佢同返HR講咪好尷尬囉，所以我暫時選擇沉默，再求其作咗個藉口想換其他resume。
我：「呢個Joyce唔錯，不過另外兩份resume唔啱，仲有冇其他resume？我想嗱嗱聲請人。」
Headhunt：「Joyce唔啱？Fit到爆喎！」
我：「因為我條team4女2男，有個就走嘅同事又係男，唔係性別歧視，只係再請多個女就會變成5女1男，我想男女比例平衡啲。」
Headhunt答咗句「明白」就連隨send多5份resume過嚟，我睇到眼都凸埋，有Sharon、Michelle、Elaine、Joseph，同埋Sun，梗係fit啦！呢幾個名全部係跟緊我嘅下屬，包括已經遞信嘅阿Sun……
Headhunt：「如果你覺得嗰個Joyce係適合，呢5個你都一定啱，因為佢哋全部係同一間公司，我知道你想要男仔，不過嗰幾個女仔都ok㗎，in case你唔止想請一個人，可以考慮埋佢哋喎，全team一齊過檔都得。」
我係咪應該讚個headhunt進取呢？如果佢淨係畀男仔我都好啲，作咗個藉口話唔要女仔都硬推其餘幾個過嚟。
諗諗下HR都有責任，你畀公司個group名人哋，順手就講埋分公司同支線啦！
先撇除上司身份，人哋搵工搵到畀你呢個headhunt揚返畀而家間公司知道，班candidate真係多得你唔少，專業啲吖嘛，你幫客請人之前冇睇清楚㗎咩，個headhunt係咪撈㗎？
反覆問自己係咪做咗啲咩令班下屬要「逃亡」，不過我自己都係入咗嚟冇耐，大家嘅工作係跟返之前，冇新嘢assign畀佢哋，更加冇鬧過佢哋，唔通係呢間公司有咩問題？到底發生過甚麼事呢？（未完待續）