投稿讀者：史丹利
香港不嬲都係一個憎人富貴厭人貧嘅地方，只係估唔到連喺office食自己嘅飯盒都要畀人睇唔起。
公司之前請咗個男仔，26、7歲，佢叫阿昌，對比起office裡面其他同事，阿昌明顯係樸實好多，唔追任何名牌，連手提電話都係好舊嘅款，個mon仲要有裂痕，其實都冇咩特別，好多人根本唔鍾意追潮流，所以最初不以為意。
阿昌做耐咗，同其他人熟咗，同事有時去玩去happy hour都會叫埋佢，不過阿昌例牌唔去，開頭我以為佢只係內向，唔鍾意應酬，但慢慢多咗接觸，佢都好坦白同我講係唔想使錢，因為屋企有啲困難，希望可以留返啲錢喺有用嘅地方，唔想用喺不必要嘅娛樂方面。
平時阿昌唔會同我哋食lunch，佢鍾意自己帶飯盒，當時已經有個好乞人憎嘅男同事笑佢嘅飯盒連肉都冇一塊，見阿昌一笑置之冇回應，反而係我抵唔住頸幫佢答：「食清啲有咩問題呀？關你鬼事咩！」
呢位好乞人憎嘅男同事三日唔埋兩日就特登去睇下阿昌個飯盒，成日笑佢一星期五日都係食幾條菜啃白飯，好多同事已經幫手鬧過條口痕友，我都私下同阿昌講唔使理，甚至可以鬧返條友轉頭，不過有啲人就係欺善怕惡，見你唔出聲就一直走嚟攻擊你，好心啦，都咁大個人喇，收下把死人口啦！
某一日，呢個咁乞人憎嘅同事又嚟料，再一次指住阿昌個飯盒喺度笑，可能佢見阿昌平時冇咩理佢，所以今次講得更過份：「喂，你係咪冇畀家用啫？你阿媽煮啲咁嘅嘢畀你食嘅，會唔會寒酸咗啲呀。」
本身習慣逆來順受嘅阿昌，應該係聽到對方用詞牽涉埋佢媽咪，今次反應超大，所有人包括我在內都嚇親，因為阿昌突然企起身扯住對方衣領，好大聲咁話：「你講乜X嘢呀！我屋企煮啲咩關唔X關你事呀！窮唔X得呀！我想咁窮㗎！我阿媽有病呀！佢想有病㗎？」
呢個時候，乞人憎同事已經畀阿昌壓到去一個partition度動彈不得，佢冇諗過平時連粗口都唔講句嘅阿昌突然變咗另一個人，所以呢條麻煩友嚇到不知所措，一粒聲都冇出，面露驚恐。平時冇火嘅人爆炸起上嚟，震撼程度係特別大，我哋幾個同事拉開阿昌，見到阿昌塊面紅晒，我知佢一定係好嬲好嬲，仲未嚟得切安慰，阿昌已經走咗出公司。
我哋幾個同事一齊小爆條口痕友，呢條PK仲要死撐：「講下笑之嘛，咁小器，唔玩得！」
唔知點解，我聽完呢句更加嬲，有同事比我快一步爆粗：「DLLM好L好笑呀？最憎你呢啲仆街，成日踩人，踩完就話講笑，人哋忍咗你幾多鑊呀？唔玩得一早打柒你啦！」
世界上有一種仆街好鍾意笑完人之後話：「講下笑之嘛，咁小器，唔玩得！」真係好多呢種人，聽到呢句已經無名火起，更何況我一早知道阿昌屋企係有困難，所以當時真係好嬲，而家知道阿昌媽咪有病，我更加明白佢嘅心理同經濟壓力都好大。
呢單嘢唔知邊個傳咗出去，連唔應該知嘅老細都知埋，同日下晝佢叫咗阿昌同麻煩友入房，原意係想做和事佬，叫兩個人握手言和，一齊做嘢唔好有芥蒂，點知阿昌順勢話辭職，我後來知道咗都勸唔掂佢。
「如果你屋企有經濟壓力，更加唔好辭職啦！」
「我會搵其他工，唔想喺度打開個飯盒都好似做錯事咁。」
「你冇錯喎！留低啦！」
無論我勸幾多次，阿昌都冇改變決定，想請佢食餐飯farewell，佢又唔肯去，我唯一可以做嘅就係同阿昌keep contact。
可能大家會覺得阿昌好傻，錯嘅唔係佢，老細又唔係追究，點解要resign呢？但我明白佢心態，呢個地方令佢唔舒服，之後喺office打開飯盒都有唔好嘅回憶，所以我只能夠祝福佢，慶幸個天都冇玩阿昌，佢好快搵到另一份工。
條口痕友而家仲喺公司，自從嗰件事之後，我冇同佢講過一句嘢，每次見到佢都會諗：「點解應該要走嗰啲仆街冇走？」