積怨全因茶水姐姐拒洗私人飯盒

投稿讀者:Kit

每朝9:30,我哋個pantry lady嫻姨都會準時到達,佢係由外判公司派過嚟,負責pantry裡面嘅清潔工作,包括洗杯、倒茶水間垃圾、提醒我哋Admin有冇茶包或者咖啡用晒之類,但就唔包括清洗同事嘅私人飯盒。

我哋Admin個阿姐偏偏會丟低私人飯盒喺鋅盤,仲要係食剩飯粒同埋餸頭餸尾嗰隻,嫻姨話如果企企理理擺喺度都會幫手洗埋,因為嗰啲飯盒擺過夜會有臭味,加上阻住佢洗其他嘢,問題係我阿姐實在太嗱渣,啲飯粒同埋餸頭餸尾唔會先倒落垃圾桶,真係就咁開水喉水浸住,因為積水緣故,好多時啲飯粒呀、骨頭呀、肉屑呀,仲會瀉晒出嚟塞住鋅盤,我行過都想作嘔,先唔計咩氣味,淨係個畫面已經好似嘔吐物。

我阿姐覺得嫻姨唔肯幫佢洗私人飯盒,搞到佢非常冇面,多次借頭借路打去外判公司投訴,但人哋一早講明私人飯盒唔洗,而嫻姨其實都妥協肯幫忙,只係想你浸水前清下飯盒啲殘餘物體啫,點知我阿姐發脾氣擺官威,覺得出錢就係你老細,叫你做就要做,所以佢一早睇嫻姨唔順眼。

早排嫻姨唔覺意打爛隻杯,係平時我哋斟水畀客飲嘅,IKEA買返嚟,6蚊一隻嗰啲陶瓷飲水杯,講真我喺度做咁耐都未見過嫻姨打爛嘢,幾年先打爛一隻杯純屬意外,點估到我阿姐趁呢次事件大造文章,再一次走去同外判公司投訴,話嫻姨態度唔好,特登打爛嘢,要求換另一個pantry lady,同時叫外判公司炒咗嫻姨,唔好用一啲唔聽話嘅員工。

投訴似乎成功,因為外判公司第二日叫咗另一位pantry lady上嚟,我有啲擔心嫻姨畀人炒咗,所以就向呢位pantry lady打探下,佢語氣略帶激動咁講:「多得你哋囉!打爛隻杯都去公司投訴,你知唔知嫻姨好慘㗎,佢老公中咗風行動不便,又冇仔女,我都係嚟頂幾日㗎咋,公司話你哋今個月畀晒錢,唔想退嚟退去,完咗今個月就算,呢座大廈幾個清潔姐姐都唔肯做你哋呢度。」

我明白呢位頂更嘅pantry lady點解咁仇視我哋,打爛一隻杯咁小事,我阿姐竟然趁機打爛人哋飯碗,換轉我係嫻姨嘅同事,都唔會想嚟呢個office做啦!

我私底下打去外判公司了解情況,問埋嫻姨屋企人中風嘅事係咪真?希望外判公司唔好因為咁而炒人。

對方答我嫻姨屋企嘅事係真,所以當日我阿姐打去投訴兼講明唔用,嫻姨覺得好委屈,又問隻杯係咪好貴?佢想賠返錢解決件事。

唔想因為我阿姐嘅私怨而累到嫻姨失業,始終上咗年紀嘅人好難搵工,所以我不斷讚嫻姨平時做嘢好好,又講埋之前嫻姨唔肯洗我阿姐嘅私家飯盒,所以成日畀我阿姐針對。

可能外判公司知我真係關心嫻姨,最後佢同我講:「我哋冇炒到嫻姨,只係調咗佢去另一棟商業大廈做,我哋唔止承包你哋嗰度嘅job,所以你放心啦!不過我都好老實同你講,我哋唔會再做你公司生意㗎喇,因為你阿姐成日投訴,太麻煩嘅客唔想留住喇,加上呢棟大廈幾個姐姐都知你公司惡做,個個都唔肯嚟,今日個pantry lady捱義氣頂到月尾㗎咋!」

我冇將呢堆說話內容同我阿姐講,因為我阿姐知道外判公司唔再派pantry lady過嚟,又不斷打電話去投訴,佢真係覺得肯出錢就大晒,只要肯出錢,人哋就一定要做佢生意…..

其實呢間外判公司僱用pantry lady,每月只係講緊3000幾蚊收費,而家人哋唔肯做我哋生意,我阿姐又冇其他辦法,結果要同老細攞budget開個pantry lady職位,聽講老細聽完好反感,因為以前外判所以平好多,又唔使提供任何福利,加上目前經濟環境唔好,所以請pantry lady一事陷入膠著狀態,我自己洗自己杯冇所謂呀,我阿姐請唔返個pantry lady就大把同事怨佢,連老細都詐型,真係抵Q死!

當然,肯出錢一定請到pantry lady嘅,但你而家嘅代價大好多囉!🤷🏻‍♂️

error: