投稿讀者：R
由於疫情嘅關係，前排所有interview都係以Zoom形式進行，其中一個position畀咗獵頭公司搵人，佢哋介紹咗兩位求職者過嚟，一個叫Karen，一個叫Ophelia，論學歷同埋工作經驗，其實兩個不相伯仲，但係做完Zoom interview之後，Karen真係無可避免扣咗分。
當日開Zoom冇幾耐，Karen屋企已經傳嚟小朋友嘅喊聲，仲要愈喊愈大聲，老實講有幾段對話我係聽得好辛苦，間中又聽到把男人聲喺度氹小朋友，但明顯氹唔掂，Karen嘅表現當然亦受到影響，因為背後聲浪太大，而佢間中都回頭望去另一邊，相信係小朋友發出喊聲嘅位置。個人認為Karen當時嘅interview表現並唔夠專業，更加唔夠專心，甚至間屋嘅背景都有少少凌亂，作為HR，我承認係扣咗印象分，多少picture到第日佢工作會唔會都係左顧右盼，好多掛慮。
我相信自己係畀個小朋友嘅喊聲搞到有啲心煩。
另一邊廂，Ophelia嘅interview表現穩穩陣陣，相對之下的確係贏一條街，順理成章地，我哋公司揀咗Ophelia，由於年尾太多工作喇，即刻就搵獵頭公司confirm。
一切看似順利，我哋亦都滿足咗Ophelia嘅要求，畀佢兩個星期後返工，但係佢on board當日並冇出現，咁我梗係要搵獵頭公司問下咩事啦，原來連個headhunter都搵唔到Ophelia，大家亂晒陣腳，我曾經以為自己講錯返工日期，不過有email可以check返confirmation，睇過係完全冇錯，我哋仲擔心唔知係咪有意外，進退失據嘅同時，headhunter大約朝早11:00打返畀我：「Sorry呀，原來Ophelia話搵到另一份工，佢要turn down offer，其實佢應該早少少講聲。」
我已經冇時間亦冇心情追究，因為呢個position真係好急，headhunter提議咗一句：「會唔會考慮Karen？其實佢好鍾意呢份工，亦都畀我感覺到好有heart，期間追問過我三至四次進度。」
對於Karen，我的確唔係太放心，特別係諗返佢較早前Zoom interview嘅表現，仲有嘈到心都煩嘅小朋友尖叫聲同喊聲。
要求再同Karen視像一次，當係2nd interview，如果之前唔係等咗Ophelia兩星期，我應該會叫headhunt嗰邊再搵多幾個求職者，唔使搞到而家咁趕。
第二次Zoom interview，Karen似乎改善咗好多，雖然我仲係聽到小朋友聲，不過今次冇喊，純粹係喃喃自語嗰種，舒服咗好多喇，最後我決定叫Karen返工，雖然佢唔係最好嘅選擇，但我已經急到冇選擇。
「Karen，你最快可以幾時返工？」
「我聽日都可以呀！」
「好吖，就聽日吖，我一陣同Headhunt嗰邊講聲，再send個email畀你。」
「多謝晒你呀！聽日見！」
Karen可能興奮得滯，冇終止個視像已經向身邊人報喜：「老公，我見成咗份工喇。」
有把男人聲答佢：「我聽到呀……」
未等到佢老公入鏡，我率先終止咗個視像。
Karen翌日返工同我講咗好多次多謝，我亦好坦白話佢知：「其實本來係請咗另一個人㗎，但係個女仔冇返到，你同佢差唔多，不過第一次Zoom interview真係太嘈喇，好多時聽唔到你講嘢，點解你唔叫小朋友出房先？之前有冇見過一啲工又係出現同樣情況？」
Karen：「有呀，不過呢，我哋冇房，嗰間屋其實係間100尺鬆啲嘅劏房，其實疫情下唔止我失業，我老公都失業好耐，佢做旅遊業，停工就快一年喇，我哋大屋搬劏房，有小朋友又好大開支，坦白講已經接近山窮水盡，所以好多謝你肯請我，經濟同埋心理壓力即刻細咗好多。」
聽完Karen咁講，我心裡面有一陣難過，每個人都有谷底，有難捱嘅日子，但係我竟然主觀地諗佢應該住緊一間正常嘅屋，有房有空間，小朋友唔應該嘈，嘈就要閂房門，我諗得太理所當然，其實佢已經盡力show咗自己最好嘅一面畀我睇。
Karen：「多謝你呀！」
佢又講喇，講多謝嘅次數已經達到雙位數。
一份工作，對於唔同嘅人有唔同嘅意義，有人唔稀罕，有人唔想返，有人一路做一路埋怨，但同時有人好渴求呢個機會，好有心機去做，甚至對佢哋嚟講係救命草。
如果Ophelia真係搵到一份更好嘅工作，無意間將呢個機會留咗畀Karen，其實都算係一個完美嘅結局，而今次件事，亦提醒咗我唔好太主觀，唔係每個人都有優越嘅環境同配套，有人的確係苦苦掙扎，喺佢能力範圍內做到最好。
希望喺唔同起跑線上嘅人，都會獲得公平嘅對待同埋機會。