投稿讀者：Marcus
老細明明宣布咗home office，但係公司有個爸爸級同事就死都要返公司做嘢，唔知仲以為佢好勤力或者搏升，原來一切都只為逃避老婆。
雖然已經有個女，但呢位同事本身係長子嫡孫，家中長輩都希望佢追返個仔，呢位同事自己都想，不過佢老婆唔肯再生，結果兩公婆就因為呢件事日嘈夜嘈，由第一波疫情嘈到而家第四波。
佢同我哋幾個同事呻過，大家都覺得呢位爸爸級同事好有問題，先唔計香港而家咁嘅環境，生小朋友隨時係害咗下一代之外，其實生BB仲需要兩公婆有共識，呢啲嘢邊有得迫㗎？當個老婆係生育機器咩！更何況而家咩年代，點解一定要生個仔先叫圓滿，已經有個女啦！為長輩嘅意見追個仔就更加戇居！
以上嘅說話已經喺佢面前講過，但似乎冇乜幫助，呢位爸爸級同事喺公司行home office嘅日子一樣照返，仲要繼續返九至六，直至有一日老闆失驚無神返公司拎嘢，嗰位同事先至冇再喺wfh期間返office，當然，佢冇返office，又唔代表在家工作嘅，話唔定走咗去快餐店做嘢呢！
早兩日公司轉返AB更，適逢喺樓下大堂撞到老闆，我忍唔住要八下當時佢點鬧個爸爸級同事，以下老闆講嘅嘢實在太正，所以先決定投稿。
老闆：「一句都冇鬧喎，淨係講咗7年前我都做人爸爸，當時老婆可能有啲產前抑鬱，成日發脾氣，我好擔心激親佢，見佢個肚鑼咁大仲同朋友出夜街，我唯有就住就住提醒佢要小心；老婆嘔，我都唔想食嘢，一直陪佢；老婆去檢查，我全日唔返工陪佢，生意都甩咗幾單；入產房我唔敢，留喺出面等，幻想過老婆會唔會母子平安，如果唔平安，我寧願唔要BB都想老婆健健康康。」
我：「最後都冇事呀，之前annual dinner 見過你個女，𠴱陣佢應該得4歲，好可愛。」
老闆：「你哋路過同佢玩幾下梗係可愛啦，生BB唔簡單㗎，嗰陣老婆餵人奶，我每次都唔會自己瞓，一定起身陪佢，一晚幾次，每次再瞓返都唔超過3個鐘，阿女賴屎賴尿，沖涼氹瞓覺，我全部落手落腳參與，驚老婆太辛苦，驚完佢產前抑鬱，又驚佢產後抑鬱。後來阿女返幼稚園，又要煩另一個階段嘅嘢，生女驚佢大個畀人呃，生仔驚佢將來壓力大，唔好話我老婆要懷胎十月又暈又嘔咁生個BB出嚟，作為男人企喺側邊都覺得好辛苦好攰，做到我咁都唔夠膽叫老婆生第二個，你為咗追個仔走去迫老婆生？仲有呢種諗法真係冇嘢好講。」
我：「好偉大呀你，當時照顧老婆又偉大，而家幫同事開竅又偉大。」
老闆：「我先冇咁偉大，全部同事返嚟又係開晒公司啲燈，一個同事返嚟又係開晒啲燈，電費唔使錢呀？我仲有個女要養㗎，諗唔通就自己去自修室做嘢啦！返office搞搞震！」
我老闆其實幾ok㗎😂