怪你過份美麗 靚女見工一定唔請

投稿讀者:貧僧法號莫財

早排公司請receptionist,有個女仔嚟見工吸引晒全公司目光,因為真係幾靚,成班男同事齋望已經墮入愛河,我連第日同佢個仔叫咩名、讀邊間幼稚園、擺酒定係旅行結婚都諗好晒喇!隔離department個同事突然好冷靜咁講咗句:「嘥氣啦!咁靚女一定唔請,我估佢20分鐘見完出返嚟。」

事實證明呢位同事判斷錯誤,因為唔使20分鐘,前後15分鐘就出返嚟。

我走去同HR姐姐講:「好心你唔好再叫啲靚女上嚟見工啦,明知浪費人哋時間,我哋又得個睇字,冇機會做同事,損人不利己。」

HR姐姐:「鬼知咩,佢份CV都冇相,點知佢係靚女喎,而家老闆娘提議請男仔呀!」

我:「Receptionist請男仔?」

HR姐姐:「你性別歧視呀?」

我:「唔係咁嘅意思,破格咗啲囉!話時話,你驚唔驚遲早炒埋你?」

HR姐姐:「唔驚喎,我肥師奶一名,郁都唔會郁我,威脅唔到老闆娘。」

呢啲都係我哋同事之間嘅日常對話,苦中作樂係咁上下。

其實之前公司都有幾個30歲以下嘅女仔,有靚嘅,有活潑嘅,有文青氣息嘅,不過近幾年已經先後走晒喇,點解?因為老闆娘對佢哋黑口黑面,語氣又唔好,之前個receptionist都係因為長期咁樣所以抵受唔住,坦白講呢班女同事內外兼備,出去搵工唔係一件太難嘅事,既然feel到氣氛唔對路,冇做錯嘢都有面色睇,搵過第二份工都好合理。

老闆娘對女員工有敵意係做得好明顯,基本上你唔係傻嘅都睇得出,佢試過話receptionist條裙太短,以前又試過話另一位女同事件衫太低胸,當時我作為男仔都完全唔覺,老闆娘執得仲嚴過學校啲訓導主任,試問出嚟打工嘅成年人點抵得住吖,我哋班男同事最多呻兩句,可憐班女同事就要硬食冷言冷語。

呢幾年每逢有女員工離職,再請返嚟嘅人都一定變咗男性,而家office嘅比例已經係80%男,20%女,同少林寺冇乜分別,而留得低嘅女同事都係年紀比較「成熟」、身型比較「健碩」、樣子比較「原始」、胸部比較「清減」……總之照目前嘅走勢,不出3年之內呢間公司嘅男女比例將會達到9:1,Wow!諗起都興奮啦係咪先?

同事會唔會因為咁而討厭老闆娘呢?走咗嗰幾位女同事一定會啦!不過我哋做得比較耐呢班反而有少少憐憫,其實幾年之前,老闆娘根本唔係坐office,亦唔會理公司嘢,直至有一次老闆同個秘書搞埋……

當年呢單嘢好大件事㗎!老闆固然係有婦之夫,而個秘書其實都係有夫之婦,不過真係身材好好同埋好姣,日日超短裙低胸黑絲返工,每日有一半時間都係入咗老闆間房閂埋門唔知搞咩。有同事曾經喺星期日見到佢兩個行海港城,拖住手嗰隻,起初都以為係認錯人,點知後來老闆同呢個秘書基本上係每朝同一時間返工,收工都係一齊,後尾先知老闆對秘書係車出車入,照顧周到。

最後點樣搞到一鑊粥呢?中間嘅過程真係冇人知,我哋淨係親眼目睹秘書個老公上嚟公司找老闆晦氣,一入門口已經講晒粗口,話要叫老闆出嚟,跟住仲自己衝入office大吵大鬧,每一句都有粗口,老闆唔敢出嚟呀,好似烏龜咁匿埋喺自己間房,反而係秘書行埋去勸個老公唔好搞事,擾攘咗一大輪,個秘書話要報警拉自己老公,最後先叫做勉強平息到。

秘書當日係扯住佢老公離開公司,嗰次係我哋成班同事最後一次見佢,之後秘書已經冇返工喇,老闆就龜縮咗半日先行出房,你估下佢第一件事係做咩?係行埋去秘書個位度,幫佢個情婦拎返個手袋,跟住就一支箭咁行出公司,慌唔係秘書吩咐佢咁做咩。

有同事之後仲戇居居咁問HR姐姐:「辭職唔使一個月通知咩?突然唔返工,使唔使賠一個月人工?」

HR姐姐當時咁答佢:「用下你個屎忽腦啦!老闆條女呀!賠咩人工呀?隨時老闆喺出面買層樓畀佢添啦!」

成件事最奇妙係咩呢?係老闆個老婆過咗幾日之後無啦啦返公司坐鎮,呢樣嘢係從未發生過㗎!以前只會喺公司annual dinner見到老闆娘,一年一次,但係嗰單嘢發生之後,老闆娘就變咗喺度返工,但係呢幾年我哋都唔知佢做咩職位,返嚟就係行行企企,上網睇劇,總之要分分秒秒睇實老闆,而且佢對公司裡面稍為生得靚同埋後生嘅女同事好有敵意。

有冇諗過老闆娘點解會知道佢老公偷食單嘢呢?我哋成班同事都唔知當中發生咩事,有人估可能係秘書搵過佢攤牌,有人就估秘書個老公搵過佢,亦有人估公司裡面有老闆娘條針,真相冇人知。

早排有同事話自己個妹做空姐,而家失業,想睇下公司有冇空缺可以引薦,HR姐姐已經封咗佢後門:「你諗都唔好諗啦!空姐!你知老闆娘咩人,一陣連你都炒Q埋,兩兄妹一齊失業呀!」

邊個話靚女見工一定有著數?有時真係睇下係咩公司㗎咋,冇必然㗎!

===
IG短文一則 😧《有樣有老公 冇樣有份工》
https://hkofficedaily.com/?p=4584

error: