是咁的, 有位同事最近同我講, 佢前女友突然搵返佢, 又約出嚟食飯, 又whatsapp傾計, 我就梗係奇怪啦, 明明記得佢哋當初分手嗰陣, 個女仔話至死不相往來, 咁我同事亦唔係蠢仔, 應約都係本住「睇下你搞邊科」嘅心態。
頭一次食飯都仲正常, 個女仔都係講下工作同近況, 唯一唔同嘅係成個人積極咗進取咗, 講到呢到, 大家都應該估到係想sell嘢, 問題係想sell啲咩。狐狸尾巴好快露出, 畢竟sell嘢梗係要講效率啦, 原來佢前女友係中咗傳銷毒, 但唔係享負盛名嘅香薰, 而係咩精神領袖課程。
可能有人已經知道底蘊, 不過呢度都略略講下呢類精神領袖課程係乜東東, 以下係一個懶人包:
1) Sell你去讀嗰條戊利通常係你嘅同事、朋友、親戚, 甚至屋企人, 佢好清楚你過去或者而家發生過咩事。
2) 呢啲精神領袖課程係「學海無涯」, 讀完一個course, 之後又有進階又乜又盛, 好鬼多階段, 勁過讀master, 搞咁多無非係要不斷cap水搵銀。
3) Sell你嗰條戊利通常會話第一個課程佢送俾你, 又或者話有啲學有所成嘅組員自掏腰包幫你俾錢, 目的係想更多人讀完可以有得著, 其實根本冇人幫你俾過錢, 呢招只係拋磚引玉, 同時令人覺得唔好意思, 嘩有人幫你俾埋錢, 想你好, 免費都唔去好不近人情。
4) Sell你嗰條戊利以前係一個廢青、頹青、蛋散、hea精, 而佢又突然容光煥發好Q積極, 好似唔知邊晚有道靈光嘭一聲打咗落去佢天靈蓋, 然後佢開咗竅, 而家嘅佢對人生充滿希望同埋激情。
5) 唔知做乜春佢啲facebook、ig post會成日 #感恩, 講緊啲唔關事嘅嘢都 #感恩, 好似當咗標點符號咁用。
呢類精神領袖課程嘅手法萬變不離其宗, 無論對白同過程點樣變奏, 以下幾樣嘢都唔會變
A) 上堂要熄電話或者交出電話, 唔可以同外界聯絡。
上堂時間超長, 鐘數好長, 例如用你全日或大半日, 好夜先落堂, 仲有密集式連續幾日上堂, 目的係疲勞爆炸, 發揮洗腦式傳銷作用。
C) 課程中會有一part係分享不快經歷或者放大自己短處。
D) 啲所謂導師會經常打擊你自信, 否定你價值, 務求你經歷一個情緒崩潰嘅moment。
E) 其中任何一次課堂缺席, 都會小到你上天花板, 嚴厲過警校。
F) 如果中途懷疑同埋放棄, 你會發覺啲所謂導師、組員, 同埋最初呃你去上堂嗰條柒頭會軟硬兼施, 並且call爆你電話, 你唔知以為借咗貴利冇還, 恐佈過屍殺列車。
G) 如果你真係讀完, 放心, 總有第二、第三、第四同埋N個課程等緊你, 佢哋會幫呢啲course巧立名目, 例如蛻變、探索, 啲名都改得行貨過人。
H) 會有一個任務或者試煉, 叫你要搵幾個人去上佢哋啲堂, 當係一份功課, 實則係行緊傳銷囉。
I) 總係有意無意鼓吹你做生意, 唔好打工, 此舉目的係之後會有好多side business叫你投資, 要先灌輸你創業先有出路嘅思想。
大家有個基本概念未? 聽日繼續講兼入正題。
【每人身邊梗有個做傳銷嘅親戚朋友】Vol. 2 – 叫埋阿爸阿媽上洗腦堂
https://hkofficedaily.com/?p=17455