講起上嚟有啲慚愧，我份工係老母個朋友介紹，喺老人院做文職助理，其實市道咁差都有份工做，真係要劏雞還神，何況我仲要冇呢行嘅經驗，可惜最後發生咗一啲事，做咗3個月就冇再做喇，而且都幾大單。
首先講下老人院嘅情況，我發覺身邊朋友都誤會咗內部文職同護理員嘅分別，因為講出嚟之後，個個以為我要餵老人家食飯，甚至係執屎換片，其實我係唔需要做呢啲。
有次我睇住個護理幫婆婆執屎換片，護理一臉嫌棄，但都好專業，唔出聲快手快腳做，然後婆婆講咗一句：「對唔住，我知道你哋都好討厭我。」我聽到之後個心好唔舒服，其實婆婆知道人哋感受，但佢冇辦法，因為已經無法自理，一切都要假手於人。
將來我老咗如果又係咁，究竟可以點算呢？
相信大家都睇過唔少新聞，當中提及到老人院有幾黑暗，唔知其他做呢行嘅人點睇，至少我嘅第一身經歷就完全認同，我亦係因為咁所以最後選擇唔做，容後再講。
呢度好多員工都做到好頹，唔同崗位各有各頹，先講下個社工，四個字形容佢～～～廢到無倫，佢每日返嚟淨係做一樣嘢㗎啫，就係開廣播讀報紙，其餘乜都冇做過，亦漠不關心老人家嘅事。
因為我身邊有朋友唔明點解要讀報紙，喺度都講少少，唔係個個老人家識字，而且睇字始終嘥精神，加上全院得一份報紙，所以就由社工開咪朗讀，不如你估下呢度係睇咩報紙吖，畀5秒鐘你
5…4…3…2…1
應該估到唔慌係蘋果啦係咪？但又未去到睇大公報嘅，呢度係睇東方，至於點解睇東方就唔知喇，因為我都係做得3個月，或者係老闆個人喜好啩～
喺度做嘢太上心的話，你會變得好灰同埋悲觀，實在有太多嘢令你覺得唏噓喇，例如丟低阿媽阿爸喺度之後冇再出現過，淨係定時定候畀錢嘅仔女。其實有畀錢但不聞不問唔算最衰，no show兼拖欠護老院費用嘅仔女亦大有人在。
其中一個阿伯就成日同個仔嗌霎，搵著我哋啲職員嚟搞，有次佢想做針灸，解釋下呢part先，詳細就之後講，總之我哋呢度係有得做針灸，咁當然要另外畀錢啦，個阿伯唔想用醫療劵，佢話要慳住用，而個仔就唔想額外畀任何錢，兩條友為呢個問題嘈咗好耐，但又唔直接對話，要我做傳聲筒。
呢度啲阿姐餵老人家食飯嘅態度非常之跳掣，心情唔好嗰陣會餵得好粗暴，有次我忍唔住出聲，點知個阿姐仲兇返我轉頭，佢話一個人要對住咁多老人家，冇時間逐個慢慢氹，而且班公公婆婆平時好麻煩，叫我睇嘢唔好睇表面。
現實生活中，好多人都鍾意講笑咁話：「第日老咗送我入老人院啦！」我喺度返完工之後好認真咁同自己講，將來到我老咗，除非係中風或者身體不由自主，否則我唔會畀自己入老人院，仔女唔養我的話，頂多去拎生果金，執汽水罐，淋濕下啲紙皮去廢紙回收，再用啲積蓄搵個納米床位，總之一定唔會入老人院。
Sorry，我好似一味唱衰，係咪睇到好唔舒服？不如我講下收費同埋點賺錢，另外再講一單好浪漫嘅愛情故事，唔係發生喺我身上，係院內一對公公婆婆。