同Eva坐喺會議室裡面傾，中途停頓位好多，因為佢講下又喊下，而最令我難過係，Eva嘅眼淚同埋情緒並唔係單一怪責佢媽咪，佢更多時候係怪責緊自己。
由讀書到搵工，甚至係生活細節，Eva好多嘢都係被安排，佢有嘗試為自己爭取、反抗、發聲，但係媽咪去到最後都會搬出一句：「你係我個女，唔通我會害你咩？我都係想你好啫！」
原來我哋公司並唔係Eva首選，佢之前仲見成咗一間做爬山同露營用品嘅公司，但係佢媽咪唔鍾意，覺得冇前途，適逢我又出咗offer，結果伯母就「欽點」個女揀我哋公司。
我：「早知當日唔請你啦，我講下笑啫。」
Eva：「唔會唔會，你哋個個都好好人，喺度返工其實好開心，而且媽咪成日話興趣唔可以當飯食，佢都講得啱嘅。」
我：「我老婆都係你呢種環境長大。」
Eva：「你老婆屋企又係管得好嚴？」
我：「與其話管得嚴，我覺得用情緒勒索同埋唔識尊重會貼切啲，講樣嘢畀你知吖，我老婆好注重私隱，超級過態嗰隻，乜嘢都要鎖起，普通一封銀行信都鎖入櫃桶，電話永遠較震機，WhatsApp msg set冇提示冇預覽，佢試過因為咁而miss咗啲公事同緊要事，你聽落係咪覺得九唔搭八？甚至認為我老婆係有古惑所以先收收埋埋？其實唔係，呢啲全部係陰影問題，我應該點解釋畀你聽呢……」
Eva：「我諗我明，因為我都係咁，講返樣嘢畀你知，我將好多私人嘢擺喺公司個櫃桶，例如舊同學寄畀我嘅明信片，同朋友出街食完飯啲單，全部都係好濕碎同無聊，冇咩唔見得光，只係好怕畀媽咪睇到，但我都唔知怕咩？」
我：「因為你媽咪冇尊重過你嘅私隱，你怕嗰種咩都畀人睇晒嘅感覺，我老婆就係咁，由細到大，佢都習慣畀家人摷佢嘅嘢，包括櫃桶同埋袋，仲會拆佢啲信，無論係私人信定係銀行信，去到佢手上都已經拆開咗。」
Eva：「同我一樣。」
最後我講咗好多老婆嘅遭遇同例子，Eva驚覺同自己好相近，但我唔忍心同佢講，最差嘅情況尚未來臨，除非你有勇氣作出改變。
大家有冇遭遇過情緒勒索？唔局限於父母，如果你嘅朋友或者另一半做過以下行為，即係代表你都曾經被情緒勒索。
＊你唔聽我講，之後唔會有好日子過，一定撞板～～～呢個角色係「施暴者」
＊你咁樣做會令我好難過好傷心～～～呢個角色係「自虐者」
＊你唔咁樣做，即係冇良心同自私～～～呢個角色係「悲情者」
唔好以為情緒勒索只係單方面嘅問題，被勒索嘅人本身都有責任，就好似Eva咁，因為佢縱容媽咪嘅不合理同埋不尊重行為，所以先會訓練出一個變本加厲嘅情緒勒索者。
＊你話我唔啱，我一定係有問題～～～呢個係「自我懷疑者」嘅行為
＊最衰係我啦，係我令你咁傷心同咁嬲～～～呢個係「自責者」嘅行為
＊只要我乖乖地，對方就唔會難做～～～呢個係「平息者」嘅行為
我唔係專家，呢啲係當年睇書學返嚟，因為嗰陣好想幫我老婆，佢討厭自己父母嘅行為同傷害性說話，正路應該唔想做返相同嘅事，就等於有啲人嘅原生家庭唔和諧，潛意識就會想快啲結婚，快啲有自己嘅家，盡早擺脫父母，無奈你由細到大受到嘅對待已經根深蒂固，不知不覺間你會重複返呢啲行為，由「受害者」變成「施虐者」。
情緒勒索呢件事如果唔勇敢面對同埋走出嚟，歷史只會不斷重演，可能將來Eva都會咁對佢嘅同事、另一半，或者仔女。
有次我哋又叫Eva唔好帶飯，因為想成team人出去飲茶，但最後佢都係繼續拎個巨型飯盒返嚟。
同事：「你阿媽都幾硬頸㗎喎，換轉係我就堅決唔帶，一係就直接倒晒啲飯餸。」
Eva：「算啦，佢煮飯好辛苦㗎！」
真係同我老婆當年一模一樣。
一直冇形容過Eva嘅外表，佢樣子甜美，不過真係肥，我覺得佢係因為媽咪先至會肥，唔知我講緊乜？我老婆同我拍緊拖嘅時候，身型同Eva差唔多，肚腩仲大過我，原本覺得好可愛，後來上佢屋企食過幾次飯，我終於明點解老婆會愈嚟愈肥。
4個人食飯，佢阿媽煮7至8個餸，份量多到可以食幾日，仲要迫大家食晒先執嘢，我都食到個肚就快爆開，但佢阿媽依然keep住講：「食晒佢啦！唔好留。」問題係佢阿媽自己唔食……
老婆話，佢阿媽最鍾意講兩句嘢，第一句係：「你係我個女，唔通我會害你咩？」，另一句就係：「食晒佢啦，知唔知我哋搵錢幾辛苦呀！」
邊個搵錢唔辛苦？得父母辛苦？後生賺錢就好輕鬆？講咗唔想食，講咗食唔落，講咗唔好煮咁多，但屋企人充耳不聞，係要仔女食晒先肯罷休，食嘢應該係享受，唔係捱；食嘢應該係本能，唔係被迫；食嘢應該係開心事，唔係一件為難嘅事。
我老婆好討厭呢種生活，但對住我哋個仔，有時佢會重複外母當年嘅行為，不自覺地向下一代作出情緒勒索。
點都好啦！Eva終於做夠三個月，正想出封信通知佢過試用期嗰陣，我忽然喺度諗，不如借機會打畀Eva媽咪，讚下佢個女之餘，都婉轉啲講一講情緒勒索嘅問題。
由上司變身社工，唔係因為屎忽痕冇嘢做，而係唔想Eva行我老婆條舊路，其實我老婆幾年前同外父外母斷絕咗聯繫……
不過，選擇向Eva媽咪說教，我後悔喇，因為出到嚟係反效果，搞到Eva要辭職唔做，唉！
未完待續。
《最好的距離 1》是愛還是情緒勒索
https://hkofficedaily.com/?p=15633