畀20變咗500 同事派錯利是想收返

新年快樂!喺公司派利是呢樣嘢,有時真係又開心又尷尬。

某年喺公司試過有同事派錯利是,場面都幾難睇,話說當時係初五返工,結咗婚嘅同事周圍派利是,本身都好地地充滿歡樂氣氛,不過有位叫Anson嘅同事隔咗日就喺度講:「唉,好似派錯利是畀Leo,好唔好問佢拎返呢?」

原來佢派咗封500蚊出去,本身嗰封就係老細派畀Anson個女。

當時另一位同事Jacky話:「乜你咁㗎,派咗出去又收返,同埋我哋派咗咁多年,一早識得用唔同嘅袋同埋利是封分類㗎啦,例如右手邊衫袋最易拎,呢啲全部係20蚊,左手邊可能係50蚊,要摷褲袋就係100蚊,再大銀碼啲就要伸手入西裝褸內袋,基本嘢嚟㗎喎,仲有唔同嘅利是封就係要易啲分,你盲㗎?」

Anson:「我知我知,但嗰封利是係老細失驚無神走嚟派畀我,叫我畀阿女,咁我收咗之後,老細又捉住我講其他嘢,隨手塞落褸袋,跟住就見到Leo,個利是封又差唔多款,就咁派出去。」

Jacky:「你咁肯定係畀咗Leo?你又點知封利是係500蚊?」

Anson:「因為另一位同事夜晚call我,話老細出手幾重,畀咗封500蚊利是佢個仔,咁我咪即刻想摷出嚟睇下囉,點知冇咗,我有印象褸袋疊廿蚊利是當時已經冇晒,本身諗住入房再包,點知Leo路過同我講恭喜發財,總之百忙中就畀咗佢啦,都好肯定下。」

Jacky:「你咁樣問人拎返利是好小家囉,何況過咗一日,如果你記錯呢?如果人哋係都唔畀返你呢?因為封利是搞到以後咁尷尬?」

聽住兩位已婚男士你一言我一語,我除咗食花生同埋驚嘆老細會派500蚊利是畀高層啲仔女之外,仲好想即刻拆晒啲利是睇下有冇「驚喜」,不過呢頭講完冇耐,Leo同日下午竟然主動還返封利是畀Anson:「Anson,你派錯利是,呢封銀碼好大。」

Anson嚟唔切反應,但不忘扮嘢:「吓,有啲咁嘅事?我都唔知添,咁大頭蝦都有嘅,哈哈!下次唔使畀返我啦,派咗出去就係㗎嘛,心意嚟㗎,你唔講我都唔覺。」高層啲演技係唔同啲。

Leo:「唔得唔得,以我哋交情冇理由咁大銀碼,我會驚㗎,你搞到我第時喺公司唔敢執番梘。」好嘢,仲識講個笑話打圓場,可造之材!

Anson連聲道謝,又係咁講唔好意思,連隨喺褲袋拎另一封畀Leo:「好啦咁,利利是是呀!今年搵多啲,身體健康!」救命,辦公室真係特別多呢啲虛假場面。

據講Anson「特別加碼」,畀咗封100蚊利是Leo(本身以佢兩個嘅交情同埋全年談話次數總和,最多值20蚊左右),失而復得,執到啦!

不過最正嘅係,Jacky過咗陣又行埋嚟搵Anson吹水:「Leo畀返封利是你未呀?」

Anson:「你點知㗎?」

Jacky:「我同佢講㗎,話你派錯封500蚊利是畀佢,又唔好意思開口問。」

我再諗返Anson頭先同Leo講嗰幾句~~~吓,有啲咁嘅事?我都唔知添,咁大頭蝦都有嘅,哈哈!下次唔使畀返我啦,派咗出去就係㗎嘛,心意嚟㗎,你唔講我都唔覺。~~~

媽,好尷尬呀!

error: