《份工重要，定係原則重要？》2018年9月14日刊出
我試過返一份人工唔高，亦可以大膽講句係冇乜前途嘅工，不過每日返工都真係好開心，從來唔會覺得係捱時間，總之一埋位就知自己要做乜，感覺好自在，成班同事就算稱唔上係兄弟姐妹，但都好熟悉對方，窒嚟窒去又收工。
只係歷史教識我哋，好景總係不常，某一日收到通知，公司玩完喇，大家可以搵定新工，從實際角度去睇，呢件絕對係好事，因為每個同事都有能力去更好嘅公司，做更好嘅工作，攞更好嘅待遇，之前一直留喺度，只係太習慣個工作環境、氣氛，仲有一班同事，留戀嘅純粹係呢份情誼，我知道嚟緊要出大海面對食人魚同埋大白鯊，冇得再同呢班傻仔柴娃娃。
然後最唔想發生嘅事終於出現，就係昔日戰友各散東西，每個人已經融入咗新圈子，各有各忙，最初都可以食下飯飲下嘢，久而久之，愈嚟愈難齊腳，可能個個嘅office hour都唔同，又可能某一兩個長期要OT，上次見面係幾時？原來已經要用年份嚟做單位。
可惜嗎？當然啦可惜啦！不過諗深一層，我哋應該開心先至啱，咁樣證明呢班舊同事好大機會已經有班落，我就曾經有一個經歷，係另一間公司嘅另一位舊同事，離職後用咗一年時間都未搵到正職，周不時打嚟問有冇工作介紹，整整一年都只係靠零碎嘅freelance維持生活，作為一位認識佢嘅人，坦白講真係好難過，雖然唔係自己失業，但個心都會唔舒服。
天下無不散之筵席，嗰啲曾經交過心，一齊共同進退嘅舊同事，我寧願佢哋忙於工作，記住同樣要好好生活就得喇，真正嘅友誼，其實唔使成日見，我哋就算冇講嘢，內心都仲係會記住同埋支持對方，所以各散東西未必唔好，大家只係要開始一段新里程啫，被生活推著走，講到底都係向前行，總好過原地踏步。
＝
👉 重溫其他蘋果日報專欄