蘋果日報專欄 請Part Time拆黃絲帶的商場

《請Part Time拆黃絲帶的商場》2018年4月13日刊出

「你係黃絲?定係藍絲?」

呢句說話係當年某一個客問我隔籬位嘅同事。

我好奇問同事:「咁你點答?」

「一嚟就問呢啲,唔知個客咩料,答佢冇話咩黃絲藍絲,我只係麻甩佬一名,最鍾意黑絲。」

呢個四兩撥千斤嘅答案,為佢換嚟咗一單招聘生意,好可惜最後都搵唔到求職者願意做,變相中空寶。

個客係某商場嘅負責人,時間係2014年雨傘革命期間。據了解,嗰個商場外圍綁滿晒黃絲帶,商場唔方便叫自己員工去拆,怕會畀傳媒影到之後大造文章,所以想請街外人去做,唔使上身,總之Part Time形式,50蚊一個鐘,有人嘅話就多多都請,因為佢哋知道拆咗又會有人重新綁返上去,呢份工完全冇任何要求,真係有身份證就做得。

如是者一個星期過後,我同事都搵唔到求職者肯做,個客加到60蚊一個鐘,依然係搵唔到人做,加到70蚊,然後80蚊,最後直接開100蚊。

客:「點搞呀你哋,100蚊一粒鐘,將商場外圍欄杆啲黃絲帶拆晒啫,有幾難呀?手板眼見功夫咋喎,香港真係咁好景?咁易賺都冇人肯做?你哋唔係成日幫會展大量請Part Time咩?搵嗰班後生仔女咪得囉,即日出糧㗎!」

「我知我知,搵過會展嗰班後生仔Part Time喇,佢哋咪就係綁黃絲帶嗰班囉。」

客:「咁樣樣,搵啲阿婆或者老童得唔得呀?啲阿婆平時收錢去示威嗌口號都係咁啫。」

「不過我哋獵頭公司個Database冇阿婆同埋老童㗎喎。」

同事為咗呢單生意吃盡苦頭,叫我哋幫手冇人睬佢,打去搵求職者解釋份工嗰陣仲畀人用粗口問候,基本上喺個客由50蚊加到60蚊嗰陣,我同事已經放棄搜索,而由於個客唔係我跟,所以我最後都唔知呢個商場係點樣拆晒啲黃絲帶。

我哋成日都話香港人冷漠、唯利是圖,但其實好多人都唔知道呢單嘢,啲求職者個個推Job,100蚊一粒鐘都唔肯做啲違背良心嘅事。

我唔會咁黑心想同事做唔成生意,但係嗰次真係例外,而我大部份時間都覺得公司個Database好廢,唯獨嗰次我覺得廢有廢好,最好廢到搵唔到。

=

👉 重溫其他蘋果日報專欄

error: