我的臥底朋友(6)

冇見兩日,大家好嘛?《我朋友去咗佢姐夫公司做臥底》嚟到第六集,姐夫嗰句:「有啲地方,有啲事,唔係單單一個人無恥,而係成班人都咁無恥。」明明講公事,又好似講緊香港而家發生嘅事。

======

臥底(6)

姐夫就住我樓上,因為家姐想住近阿媽,小朋友亦都想有老人家幫忙照顧,所以姐夫結婚之後買咗個喺我哋樓上嘅大單位。

由於家姐唔煮飯,我哋基本上晚晚一齊食,呢晚我直接將阿Rick性騷擾Candy嘅事講出嚟,比較出乎意料嘅係,姐夫嬲過我。

「有冇搞錯呀!喺我公司搞埋啲咁嘅嘢!」你可以話姐夫憤怒嘅根源並唔係心痛一個女同事,而係有人隨時搞到佢公司名譽掃地,不過點都好,起碼佢嘅態度係要解決件事,唔會當唔知道。

呢個時候家姐講:「但你要小心處理喎,記唔記得當年我哋拍拖,你仲住喺大圍,有次我哋搭火車出緊旺角新世紀睇戲,我同你見到個女仔畀人抽水,即刻衝埋去鬧個男人,你仲打埋電話報警,最後個女仔可能太驚定唔知怕尷尬,不斷話唔使唔使,一到站就衝咗出車,留低我哋同個男人罵戰。」

姐夫:「點會唔記得呀。」

家姐:「如果你直接問Candy,佢又會知係細佬講,如果你問Daniel,最後又點解決阿Rick呢?即係直接話Daniel隱瞞件事,驚唔驚呢條友懷恨在心?」

姐夫:「我唔理,阿Rick就炒硬,呢啲嘍囉少一個唔少。」

家姐:「我講緊Daniel呀。」

唔知點解,佢兩個講起Daniel互望咗一眼,背後似乎有其他故事,但我都唔方便問太多喇,等老細落order啦!

第二日返去,姐夫一早叫咗Gilbert入房,我諗佢兩個起碼傾咗個半鐘,連Daniel都行出嚟「裝」咗老細房幾次,似乎佢都好想知Gilbert同我姐夫傾咩,因為冇理由唔搵個高級啲嘅走去傾。

Gilbert行出房之後直接搵Candy:「Candy呀,15分鐘後同我出去見個客吖,你執幾隻sample先。」

如無意外,姐夫應該要做嘢,所以特登叫Gilbert同Candy出去先,唔想個女仔尷尬。說時遲哪時快,阿Rick內線響起,佢聽完好快收線,然後Daniel已經嚟到我哋座位嗰行前面,等埋阿Rick一齊行入老細房,閂埋門傾咗半個鐘左右啦,Daniel同Rick面燶燶返出嚟,阿Rick返埋位喺度執嘢,Cliff發覺唔對路所以問咗一句:「做咩無啦啦搣晒啲海報呀?」

阿Rick:「辭咗職喇,唉,人工又唔係多,有friend介紹新工畀我,無謂嘥時間喺度做啦!」

Cliff:「冇聽你提過嘅?都要一個月通知㗎?」

阿Rick:「嗰陣未confirm咪唔提囉,而家扣埋啲假,啱啱同老細傾完可以提早走。」

食屎啦你!擺明就係炒啦!會唔會無啦啦十一點幾執嘢走呀?其實feel到Cliff唔信㗎!不過隔離左右啲人見到都識做,冇特別追問,而阿Rick執完嘢就行咗入Daniel房講兩句,同一時間HR拎咗啲唔知咩上嚟畀阿Rick,Lunch time一到,公司三分二人出咗去食飯,阿Rick就一袋二袋離開公司,性騷擾女同事你唔覺得丟架,畀人炒就要咁低調怕丟架?真係好笑!

我WhatsApp約姐夫食lunch想知咩事,佢話費事畀人見到,怕Daniel有事會入我數,今晚返屋企先慢慢講。

晚飯時姐夫講返朝早件事,佢當時兜口兜面問阿Rick性騷擾單嘢,仲鬧埋Daniel冇同佢報告。姐夫話阿Rick最初唔認,然後佢提議call Candy返嚟三口六面傾,再唔係就直接報警,跟住阿Rick先至話純粹貪玩講笑,仲好驚咁話唔好報警,最後佢自己辭職,姐夫補多句:「你自己走就最好啦!但係如果Candy之後堅持要報警,我都會畀佢揸主意。」

家姐:「Daniel呢?」

姐夫:「黑面囉!」

姐夫仲講咗另一件事畀我聽:「我阿媽,即係你家姐個奶奶,佢係大陸落嚟,佢細細個住嗰條村曾經發生過一單嘢,因為喺大陸呢個地方,其實有好多拐賣兒童,仲有拐賣婦女嘅事,當時條村有個男人買咗個女仔返嚟,個女仔又係被拐嘅,好細個,咁就唔知頭唔知路被迫做人老婆,個男人仲要成日打個女仔,我阿媽話見親個女仔都係遍體鱗傷。」

我:「大陸而家肯定仲有發生。」

姐夫:「一定有啦!阿媽話個女仔當時偷走過幾次,但係都失敗,個男人捉佢返嚟又打多兩錢重,好在最後一次係成功,而最好笑係咩?最後呢次唔係偷走嘅,係警察去到救人,救出嚟嗰陣,成條村啲人唔係鬧個男人,係鬧個女仔,類似話佢剋夫、忘恩負義、報公安拉自己老公,然後個男人啲屋企人就鬧佢已經唔係處女,出去都唔會有人要,因為畀佢哋個仔搞過,仲有啲好難聽嘅說話,類似幾年都冇仔生,邊個男人娶著你就倒霉。」

我:「CLS!但係諗諗下,喺大陸發生呢啲事又好似唔意外。」

姐夫:「係呀!所以我阿媽落嚟香港生咗我之後,一直冇再返大陸喇,上年幾次遊行佢都同老豆出去㗎,佢話咁辛苦落嚟都係憎大陸憎共產黨,唔明點解有班新移民嚟到又係咁話大陸好,又睇埋啲大陸台,咁鍾意大陸點解唔死返上去喎,我阿媽激過我呀。」

我:「佢真係一個好型嘅老人家。」

姐夫:「我講呢件事係想話你知,有啲地方,有啲事,唔係單單一個人無恥,而係成班人都咁無恥,我阿媽大陸嗰條村啲人就係咁,我唔想我公司都係咁,阿Rick性騷擾女同事係無恥,Daniel包庇佢都一樣咁無恥。」

我硬係覺得姐夫想郁Daniel,不過又有顧忌……

返咗工差唔多一個月,另一位女同事Cathy都辭職喇,我嚟呢間公司唔夠30日,已經有兩個人走咗,雖然一個係自己走,一個係畀人炒,仲有一直話搵緊工嘅Candy。

然後,姐夫同Daniel似乎要開戰……

===

臥底 1
https://hkofficedaily.com/?p=10344

臥底 2
https://hkofficedaily.com/?p=10391

臥底 3
https://hkofficedaily.com/?p=10386

臥底 4
https://hkofficedaily.com/?p=10382

臥底 5
https://hkofficedaily.com/?p=10404

臥底 6
https://hkofficedaily.com/?p=10414

臥底 7
https://hkofficedaily.com/?p=10425

臥底 8
https://hkofficedaily.com/?p=10441

臥底 End
https://hkofficedaily.com/?p=10449

error: