我的臥底朋友(3)

大家咁熟,唔使上文提要啦!如果冇睇《我朋友去咗佢姐夫公司做臥底》頭兩集,可以loop前少少睇返。

好喇,唔阻大家,開場!

======

見到女同事喺後樓梯喊真係好電視劇情節,但又真實咁出現喺我眼前,加上冇心理準備會有呢啲畫面,所以我當時好廢咁講咗一句:

「你冇事吖嘛!」

Candy冇直接答我,只係擰頭,然後我都唔知再講咩,想畀紙巾佢,剿下褲袋,唉~~男仔真係唔會袋紙巾,乜都唔理繼續行落樓下辦房又好無情,不過大家唔係識咗好耐,佢未必肯同我講,終於硬住頭皮再問一句:

「係咪有咩事呀?唔怕講喎,睇下有咩幫到你。」

Candy擦住眼淚講:「我冇事,唔好意思。」跟住就行返入去office。

雖然唔知咩事,但我的確對Candy心生憐憫,仲多咗留意佢,一直盤算緊係工作上嘅挫折定係同男朋友鬧交,好想知道個答案,我都分唔清係想幫姐夫查嘢定係滿足自己嘅好奇心。

其實喺呢間公司做嘢真係唔多聚財,姐夫基本上唔會同下面有咩接觸,只有幾個department head每日定時定候入房同佢報告工作,咁都好難怪嘅,姐夫一行出嚟,個個同事都會唔同晒,傾緊計會停,上網睇緊其他嘢會轉返去公司system嘅版面,仲會不其然咁坐直晒,有啲人準備去pantry斟水都扮晒嘢搵同事問呢樣問嗰樣,總之就唔想同佢哋老闆有eye contact或者埋身接觸。

仲有一個好奇怪嘅現象,嗱,工作對外時有人留難你好正常吖,始終唔同公司各為其主,但係你喺自己公司都一樣有人留難你㗎喎,同每個department交接啲嘢都唔係好順利,同事與同事之間唔係好友善,大嘢未到我去跟,冇資格評論,就講單細嘢先吖,每個星期claim車錢啫,早咗拎啲單畀Admin個八婆又話我太早,遲比又話太遲,朝早比又話忙緊,下晝比又話阻住佢收工,總之勞煩到佢做嘢就要睇佢面色,不過呢樣係你份內事,我係一定要比你㗎喎,其他部門都係一樣,總之個個唔想做,pass啲嘢過去就當你殺父仇人,喂,大家都係做嘢啫,我做contract base臥底都盡本份啦,你哋full time嚟㗎,專業啲好冇?

大家對外已經咁受氣,點解自己同事之間唔可以多啲體諒同埋寬容呢?係咪心理唔平衡?

因為對Admin條八婆已經本能性地反感,呢一日佢仲走去我隔離位寸Candy,或者以一個臥底身份嚟講,我應該忍下,可惜我勒唔住做咗炸兩。

呢日朝早11點左右,條八婆行去Candy度講咗句:「你又化妝呀!係咪未有男朋友呀?」

Candy都好愕然,唔知點比反應,我忍唔住搭嘴:「我哋做sales要出去見客㗎喎!」

Admin八婆:「係啫,你哋都唔使日日出去見客,但Candy日日化妝喎,仲唔係想搵男朋友?」

我:「咩邏輯?你夜晚有兼職㗎?你從來化妝都只係為咗比男人睇?」

成班同事望住我呆晒,包括Admin條八婆都露出不可思議嘅表情,我知我係因為身份問題先夠膽咁講,佢哋當然唔知啦!最尷尬嘅時候,竟然係肥仔風打圓場:「後生女係鍾意化妝㗎喇,我表妹中學都成日化妝,哈哈,生日禮物仲叫我買枝L’Arc-en-Ciel畀佢。」

Daniel都走埋嚟幫手解圍:「咩L’Arc-en-Ciel?Band嚟㗎喎!」

肥仔風:「咩L-O-C-C,唔知咩……」

Daniel:「L’Occitane,唔係讀L’Arc-en-Ciel呀!」

Admin條八婆喺Daniel同肥仔風一人一句嘅時候黑面走咗,然後佢兩個都分別同我講:「傻㗎你!得罪阿Win(Admin條八婆),你冇好日子過㗎!」

哈!冇好日子過?我返3個月㗎啫,有咩事你睇下姐夫炒咗個Admin定係同家姐離婚囉!

Candy私人WhatsApp我講:「唔該晒,不過下次唔好駁阿Win喇。」

唔知點解收到Candy嘅msg真係好開心,等到Daniel行開咗,我就覆返佢:「冇事,唔驚,今日下晝我要同Daniel見客,不如聽日一齊食lunch吖。」

Candy:「聽日約咗附近返工啲friend食,下星期一好唔好?」

我:「好呀,一於咁話!」希望到時可以問清楚Candy早前為咩喊啦!

Admin單嘢,Daniel雖然出手解圍,但我完全唔感激,因為呢條友真係好假,正宗雙面人,下晝我同佢出去見客,撞正「和你Lunch」,Daniel話:「幾時先捉晒呢班仆街?返工唔好搞咁多嘢啦!你睇下對面戴豬咀條友,係撚呢頭返工咩,根本就係學生,又出嚟搏亂搞事!」

同佢拗咗幾句之後,我問:「你知唔知我哋老細黃定藍?」我梗係知姐夫深黃啦,想chok下條友知唔知啫!

Daniel:「老細黃㗎!次次都罷工,我打份工有得放假唔通唔放呀?你哋咪遊行囉,我約朋友打牌話之你!」

因為個客就喺前兩條街,好快就行到,上到去先知個客未返,等咗幾分鐘先出現,個客一入房就同我哋講:「唔好意思,頭先成班同事『和你lunch』,遲咗返嚟,你哋有冇去呀?」

Daniel呢個唔要面嘅仆街竟然答:「有呀!721都唔係路,班死差佬,唔出嚟表達訴求點得呀?」

仆你個街,我真係忍唔住:「吓,你頭先唔係咁講喎!」

Daniel怒睥我仲好嚴厲咁講:「叫你拎啲sample呢?拎出嚟啦!」

個客都知我哋唔對路,但佢好識做,同我哋照傾公事,應該係怕我呢啲做細嘅二打六得罪大佬,返去會有排受(後來我都知呢個客好好人)。

總之呢一日我就一炮雙響,上晝得罪Admin條八婆阿Win,下晝輪到Daniel,開始比人玩針對,我應該要調節下心態,因為成日提住自己係臥底,老細係我姐夫,冇用到普通打工仔心態去同人相處,無奈之後再發生一件事,可能我嘅臥底身份已經揚咗……

===

臥底 1
https://hkofficedaily.com/?p=10344

臥底 2
https://hkofficedaily.com/?p=10391

臥底 3
https://hkofficedaily.com/?p=10386

臥底 4
https://hkofficedaily.com/?p=10382

臥底 5
https://hkofficedaily.com/?p=10404

臥底 6
https://hkofficedaily.com/?p=10414

臥底 7
https://hkofficedaily.com/?p=10425

臥底 8
https://hkofficedaily.com/?p=10441

臥底 End
https://hkofficedaily.com/?p=10449

error: