我的臥底朋友

呢個係朋友嘅親身經歷,佢姐夫我都識,因為曾經搵過我當時間headhunt公司請人(我承認係我R返嚟既🙈),前後都做過佢兩單生意😂

然後早排發生咗啲事,我覺得好有趣,大家想睇落去我會再寫。

以下係佢口述,我用第一身代筆。

======

話說我失業咗大半年,其實都唔可以話係失業,因為冇認真搵過工,間中有啲freelance做下,加埋之前有積蓄,自己又唔大使。本來年頭想搵工,撞正武漢肺炎爆發,返工好危險,而且冇公司請人,咪打算唞多半年囉。

家姐擔心我變廢青,所以叫我去姐夫公司返工,我死都唔肯:「最憎幫屋企人做嘢,壓力大,你畀得萬零蚊,我做下freelance好過啦!我返姐夫公司都係打下機煲下劇㗎咋,費事你到時難交代。」

點知家姐話:「5萬蚊一個月呢。」

我:「5萬?哈,吹大啲吖嘛,唔好話10萬?」

家姐:「你姐夫公司個個月都有人辭職,佢淨係搵headhunt agency請人畀嘅錢真係每個月過10萬,而家佢好頭痕,叫我問你可唔可以去佢公司做下,唔好畀人知道你哋關係,佢想知點解咁多人走?想知道下面發生咩事,因為人人對住老細又係另一個樣。」

我:「真係5萬一個月?」

家姐:「本來係,不過你話打機煲劇唔做嘢,冇嘢喇。」

我:「傻啦,5萬一個月我洗廁所都得呀! 姐夫叫我做乜我就做乜,要唔要幫佢洗埋底褲?我OK呀!我會好畀心機做㗎!做一年都60萬,然後我先辭職去歐洲玩幾個月。」

家姐:「你就想,姐夫話搵你入去做3個月左右咋,擺你做針,佢想知道有咩咁難做?唔想再走馬燈咁換人,因為啲經理次次都話係班後生仔唔聽教,個個做唔長,你幫佢收下料啦!」

我:「得3個月咋?都好啦,照殺,不過HR實懷疑喎,點會請個新人返去畀5萬一個月呀,傻都知係皇親國戚啦!」

家姐:「你同佢都唔同姓,同埋你份糧表面係出萬五,另外三萬五姐夫每個月畀cash你。」

我:「係真唔係呀?稅都唔使報喎!」

家姐:「記住,你身份係headhunt agency補畀公司嘅replacement,之前佢哋介紹嘅sales走咗,佣金畀晒,冇得退錢,只可以免費搵返個replacement畀你姐夫,即係你老細。」

我:「但係我未做過sales,見工都未必過到啲team head啦!」

家姐:「呢層你唔使擔心,佢個sales team阿頭講明鍾意請白紙,驚搵啲太多經驗嘅人返嚟會唔聽話,你個角色背景係老細video call同你interview咗,見你正正常常就執返嚟當replacement,唔想蝕畀headhunt agency。」

結果,我真係入咗姐夫公司做臥底,sales team,第一日welcome lunch,個Team Head就同我講:「你之前係同老細遙距見工?冇上過嚟interview?」

我:「係呀,老細話武漢肺炎,視像interview ok喎,多謝你哋畀機會。」5萬蚊一個月,交足戲啦!

Team head:「你聽聽話話畀心機做就得㗎喇,老細就好睇我嘅,我話你得就得,唔得就唔得!」

我:「真係㗎?我見老細都幾好人。」

Team Head:「麻麻地啦,邊有老細真係好人吖,不過我同佢好熟,有時老細會私人約我出嚟飲嘢㗎!」

返到屋企我問姐夫:「Daniel話同你好熟,會出嚟飲嘢,你好睇佢㗎?」

姐夫打住「動森」冇望我,淨係講咗句:「痴鳩線,lunch都冇同佢食過,我聽日返去炒咗佢。」

我:「又唔好炒住,我了解下先啦!」

姐夫繼續打機都係冇望過我:「好啦,見你都幾畀心機,keep住報告我知啦!」

======

#唔知你哋仲想唔想跟進
#留言話我知啦
#5萬一個月我都想做
#雖然暗底其實係contract工得3個月合約

===

臥底 1
https://hkofficedaily.com/?p=10344

臥底 2
https://hkofficedaily.com/?p=10391

臥底 3
https://hkofficedaily.com/?p=10386

臥底 4
https://hkofficedaily.com/?p=10382

臥底 5
https://hkofficedaily.com/?p=10404

臥底 6
https://hkofficedaily.com/?p=10414

臥底 7
https://hkofficedaily.com/?p=10425

臥底 8
https://hkofficedaily.com/?p=10441

臥底 End
https://hkofficedaily.com/?p=10449

error: