同事被炒後聲稱失憶再返工

公司做醫療用品,舊式工廠大廈,文職Office同個倉喺同一層。

倉嗰邊有個同事叫阿偉,聽講做嘢好冇交帶,成日遲到曠工,貨倉個大佬忍無可忍終於炒咗佢。

我係文職嗰邊,冇咩事唔會過去貨倉,亦唔會理貨倉嘅事,但如果你問我對阿偉嘅印象係點,我會答:「冇乜印象。」因為比較少見到佢,耐唔耐入倉睇sample都係由貨倉大佬親自招呼我。

阿偉被炒之後半個月,有一個朝頭早突然見佢出現喺公司,由於我遲返唔知發生咩事,所以當時第一個反應係問同事:「佢返嚟攞票呀?」

同事:「聽講佢撞車,跟住失咗憶,好似話唔記得畀人炒咗,今朝無啦啦返嚟開工。」

我:「CLS,我係咪要笑?」

同事:「唔好笑呀,貨倉大佬好認真咁同老細傾緊呢單嘢。」

戲劇性嘅係貨倉大佬真係請返阿偉,與其話「請返」,不如叫「復工」貼切啲,始終我哋唔係咩大公司,請人炒人都冇咩formal架構,加上貨倉嗰邊冇揸得咁緊,佢哋之前請人都係去勞工處登廣告,甚至喺工廠大廈樓下個通告版貼紙仔,仲係好原始同埋老派嘅運作方式。

趁阿偉返過去倉做嘢,我哋成班Office同事捉住貨倉大佬八卦,想知呢單咁曲折離奇嘅事有咩來龍去脈,原來阿偉嗰朝一早返咗嚟,貨倉大佬見到都嚇一嚇,阿偉自己唔記得已經被炒,仲話早排撞車搞到局部性失憶,完全冇印象已經唔喺度做,所以先至會返嚟開工,當知道真相後即刻求貨倉大佬畀次機會,仲話冇印象之前成日遲到,承諾將來一定聽聽話話,畀心機做好呢份工。

我份人比較衰:「如果阿偉話畀外星人吸咗去,冇晒記憶,而家返落地球再開工,你都一樣信?」

貨倉大佬:「你唔好咁啦!佢都好可憐㗎,反正又未請到人,畀個機會佢囉!」

我:「睇唔出你係鐵漢柔情尹揚明,撞車失憶真係吹得太大,有冇醫生紙呀?」

貨倉大佬:「我唔係咁蠢嘅,阿偉話聽日會拎醫生紙返嚟。」

你唔蠢?最蠢係你呀尹揚明!第二日阿偉又消失風雨中喇!

我提出咗一個哲學性嘅問題:「咁究竟阿偉而家係真失憶,復工後第二日唔記得又要返工吖,定係恢復咗記憶,記得自己已經唔使返工呢?今日冇返工係失憶定有返記憶呀?」

「尹揚明」知我有惡意,所以冇回應,但不忘執返啲沙:「咁佢突然返一日搏乜吖?阿偉冇追返噚日人工㗎,特登返嚟拆箱搬貨咁無聊呀?」

無論如何,已經冇人聯絡到阿偉喇,而謎底就相隔一個星期後解開,因為有大耳窿打去倉嗰邊追數,再過多幾日,直情有幾條惡形惡相嘅公仔佬走上嚟公司搵阿偉。

組織返件事先,綜合大耳窿嘅講法,原來阿偉上星期去佢哋度借錢,呢間唔係邦民、安信、UA,係嗰啲三四線財仔,還錢亦唔係每月還一次,而係每星期還一次,阿偉第一期已經冇還,所以搞到要打嚟追,再搵人上嚟睇睇阿偉係咪匿埋。

咁阿偉點解要返一日工呢?

話說財仔要打電話確認佢做緊呢份工,但阿偉表示自己做倉,成班同事忙搬嘢唔會聽電話,所以要check就等佢第二日返公司先,到時可以親自接電話確認。

簡單嚟講,阿偉當日扮失憶再返工,純粹係想借錢時可以填到工作證明,人哋check公司電話嗰陣,佢可以及時聽到,咁就可以順利借到筆錢,然後財到光棍手,又一早冇打算還,所以第二日咪唔做囉!

呢件事半年前㗎喇,到而家都冇人搵到阿偉。

投稿讀者:尹揚明個同事

error: