清假去咗日本旅行，本身諗住放低工作玩7日，點知第2日已經喺澀谷個十字路口撞到熟人，有幾熟？5成熟啩，嗰個人係我舊老細，以前每日返工都對住，但除咗公事以外又唔會點傾計，半生熟係咪都畀多佢呀？
其實呢個澀谷十字路口真係好累事，有咩特別啫？咪又係馬路一條，不過抬起頭五光十色嘅廣告牌加上四面八方嘅人潮就令唔少遊客駐足影相，包括我男朋友，就係咁樣影一影，突然有個人喺我耳邊叫咗聲：「Tania？」
呢度話晒都係東京，咁都撞到熟人？只可以話澀谷個十字路口係遊客熱門勝地，我撞到舊老細嘅時候佢係拖住老婆，而我男朋友就拎住部相機行嚟行去影咗幾十張相都未捨得走。
我：「鄧生？咁啱嘅？東京都撞到？」
舊老細：「係囉！自己一個人嚟日本玩呀？」
我：「我唔係自己一個，嗰個影緊相嘅係我男朋友。」
舊老細個老婆笑容滿面好nice咁叫我哋一齊食飯，其實我推緊㗎喇，點知男朋友影完相行過嚟大家再介紹一次，條友竟然未得我同意就答應一齊食……
由十字路口行去SCRAMBLE SQUARE嘅時候，稍稍殿後嘅我細細聲鬧男友：「你做咩應承一齊食飯呀？」
男友：「我以為你頭先應承咗咋？你唔想㗎？」
我：「有冇人會想旅行同舊老細食飯呀，用下你個死人腦啦！」
男友：「咁唔應承都應承咗啦，食餐飯好快啫！Sorry囉！」
我哋上咗SCRAMBLE SQUARE食一間鐵板燒，lunch都萬幾円，因為係唔知咩龍蝦餐，舊老細最後主動埋單，我男友真係由心笑到出嚟。
雖然over我旅行食飯嘅budget，但我都有主動提出畀返錢，點知舊老細個老婆話：「梗係有大食大啦！你使咩同佢慳。」
舊老細：「咪係，你唔畀我請，一陣老婆鬧我㗎，夜晚有冇咩行程呀？我哋book咗敘敘苑喎，老婆你睇下可唔可以打去改4位，你識日文吖嘛！」
男友竟然搶答：「好喎，本來我哋都諗過去食，不過又好似幾貴。」
我：「你唔好咁失禮啦！」
舊老細：「得啦，跟埋我哋兩公婆去食咪得囉！」
我男朋友真係老實不客氣，講真我覺得好樣衰，仲千叮萬囑佢食敘敘苑要夾返錢，點知舊老細又搶住埋單，然後再約下一餐，男友話盛情難卻好難推喎，其實佢根本想慳錢！
男友嚟到東京之後睇中一個名牌銀包，咩牌子我唔講喇，價錢係¥114,400（HKD 6674），認真我覺得好肉酸，唔一定名牌就靚㗎！佢有個私人loan未還完仲買個咁貴嘅銀包做乜呢？本身男友都係得個恨字，而家見我舊老細請咗幾餐就話慳唔少，決定臨返香港之前去買個銀包獎勵自己。
舊老細兩公婆又好好人，每餐飯之後都係各自行街或者返酒店，到食飯時間先約喺餐廳等，結果一連三日食咗六餐，每次都食得好貴好架勢，萬幾円鐵板燒同埋敘敘苑已經好小兒科，之後仲食咗間叫做Kadowaki嘅懷石料理，我同男友之前都未聽過，一位要4萬幾円，舊老細仲要特登改時段，因為佢哋本身book嗰個時段冇4位，最終要提前去食，真心唔好意思。
另外幾餐就分別食咗壽喜燒、壽司、和牛，另外仲去咗間好高級嘅中華嘢，舊老細話佢個friend有份投資，所以特登嚟試下。
已經一而再再而三警告男朋友唔好再答應舊老細一齊食飯，人哋客氣叫埋你係因為有教養，你老實不客氣餐餐都痴飲痴食就好low㗎喇，點知講完都係冇用，因為舊老細會當面叫下一餐再一齊食，而我男友就會即刻答好。
食完第六餐，舊老細又話第二日再一齊食，呢次我唔等男友開口，自己搶住答：「我哋聽日去富士山呀，唔喺東京。」
終於要用呢招先可以完結，唔係唔想同舊老細兩公婆食，但我真係唔可以再食免費餐喇，佢哋又打死都唔肯收返錢。
食到第六餐我先至發現舊老細個銀包係勁殘舊，殘到已經甩晒皮，我問佢用咗幾耐。
舊老細：「呢個銀包呀？10年都有喇，我老婆送嘅。」舊老細老婆隨即表示係當年親手整，DIY冇牌子。
雖然個銀包好舊，但係我見到裡面啲錢係漲卜卜，唔知係Yen定港紙，但真係好漲，我即刻望住男朋友講：「銀包值幾錢唔重要，最重要係入面有錢。」
舊老細同佢老婆聽完喺度笑，男友又跟住笑，你笑乜鬼啫，我畀緊說話你聽呀！
臨尾同舊老細個老婆一齊去女廁嗰陣，我夾硬將10萬円畀咗佢，最初佢老婆梗係唔肯收啦，不過我話真係冇理由食免費餐，而且我已經唔係舊老細個下屬，點講都唔通。
舊老細個老婆：「咁我咪仲唔好意思，你哋本身唔係打算食呢啲，變相你用多好多錢，你收返啦，唔使客氣㗎！」
我：「調返轉講，如果唔係你哋book到位，有啲餐廳我都入唔到啦，所以你哋帶我去食已經係好難得嘅體驗，淨係懷石料理嗰餐都一人4萬幾円，我而家畀10萬円兩個人已經賺突，你連呢少少都唔收我會好內疚㗎！」
好在舊老細個老婆終於收咗，佢仲應承我返到酒店先同老公講，免得大家喺東京街頭推嚟推去咁失禮，真係喎，人哋客氣，你都唔可以老實不客氣，我過唔到自己嗰關。
結果我男朋友臨走前都係買咗個¥114,400嘅名牌銀包……唉，佢仲係唔明白「銀包值幾錢唔重要，最重要係入面有錢」呢個道理。
追咗公司個女神發覺佢卸妝後有啲樣衰
https://hkofficedaily.com/?p=16804
老闆唔畀OT趕人走放假覆電郵會喪鬧你
https://hkofficedaily.com/?p=18151