老細周不時會同我哋班Sales & Marketing出去見客，呢樣正正係我最苦惱同埋覺得有壓力嘅地方，唔係怕佢chur或者捽數，相反地佢份人係幾玩世不恭，但偏偏就好咸濕好爛滾，好似每日都要嫖一嫖先安樂。
咁咸濕係個人問題啫，關我咩事？梗係關啦，老細會起勢叫你同佢一齊去嫖，平時喺office佢好正經，一出到街就痴晒線，典型嗰種望女仔會望到行過咗都擰返轉頭繼續望嘅咸濕佬，所以拍住佢出去做嘢真係好樣衰，加上次次見完客都唔肯即刻返公司，又話要揼邪骨，又話要去一樓一，全程不斷叫你一去齊，煩過我個仔喺屋企扭玩具。
唔知老細係有心定無意，我哋成條Sales & Marketing Team都冇女仔，可能佢都驚自己失控，費事咸咸濕濕畀人告性騷擾。跟咗佢幾年，講真平時係幾好玩嘅，呢個老細唔會頓起個款，五十幾歲人仲好講得笑，除非發生好大鑊好大鑊嘅事，否則甚少黑面，成日同我哋講唔使咁緊張，呢方面係難得㗎！
我知道有個別一兩個同事會陪佢去滾，或者佢哋覺得可以同老細玩得咁close好自豪啦，所以次次去完都會返嚟講，最好笑係之前有個新仔入嚟做，又係client visit之後畀老細叫咗去唔知邊度嫖，返嚟之後係咁怨，話以為可以出公數喎，點知老細埋單嘅時候同佢講：「呢啲唔可以幫你出錢㗎，唔係你會行衰運㗎，叫雞一定要自己畀錢。」結果條新仔之後就冇再跟埋去嫖喇。
冇疫情之前你點滾係你嘅事，但而家疫情爆到七彩仲去嫖？唔驚愛滋同性病，都驚Delta同Omicron啦，你惹到咪即係全公司中晒，會唔會太自私呀？我有時仲幻想一種情況出現，如果你叫緊雞嘅時候被圍封咁點算？即使你當時冇事，之後爆單嘢例如話新興大廈爆發，去過嘅人士須進行強檢咁又點呢？我真係問過老細呢條問題，而佢係咁答我：
「咪傻啦，邊有人會認自己去過㗎？就算唔講叫雞，社區都大把隱形患者，根本冇得切斷，同傷風感冒一樣之嘛，會唔會有一日全香港突然冇人傷風吖？唔會吖嘛！你唔去驗咪唔會中囉，如果你去驗，分分鐘而家係你中Omicron而我冇中㗎！」
老細份人就係咁，所以疫情下我同佢拍住做嘢真係有啲恐懼。
初時以為疫情期間嗰啲風月場所被勒令收檔，應該暫時唔使煩啦，原來咁樣諗太天真喇，仲有無數嘅邪骨、邪足、141、樓上鐵竇、PTGF……等等，老細嘅Telegram裡面join咗好多成人資訊群組，呢一行仲係好蓬勃，只不過轉咗少少形式同埋低調咗啫。
都係嗰句啦，單嫖獨賭係個人自由，價值觀唔同唔緊要，我驚中招，你唔驚確診，亦絕對唔係重點，老細要拉埋同事去滾先至係問題所在，我覺得佢有少少貪玩同埋好勝，因為我由始至終都好抗拒，所以每次一齊client visit之後都要捉埋我去，咪以為就咁講兩句，次次都糾纏好耐㗎！
我剛入嚟做新人嘅時候，試過見完客要等老細揼埋邪骨先一齊返公司，所以自己喺骨埸附近搵茶餐廳坐低食tea，當時我覺得好似小朋友喺馬會門口等老竇買完馬出嚟咁，後來我過咗試用期就睬佢都傻，梗係自己搭車返office先啦！因為等老細「完事」好煩㗎，佢會捉住你不斷講「賽後報告」，聽到你好尷尬。
老細曾經同我講過一句說話：「未叫過雞學咩人做Marketing呀？」當時新吖嘛，咪唔敢駁咀囉，後來做耐咗我忍唔住問：「老細，記唔記得你話過我，未叫過雞學咩人做Marketing？其實點解做Marketing一定要叫過雞？」
佢扮失憶話冇咁講過，但我肯定有。
其實老細結咗婚仲有一對仔女，所以我唔明白點解仲要出嚟滾，去滾都算，唔使咁密喎，疫情之下就唞唞啦，唔顧自己都顧下屋企人吖嘛，試過好言相勸，不過條友講埋啲歪理。
「你唔驚惹到啲病畀你老婆咩？」
「阿仔，唔通我會打真軍咩？其實男人去滾，係可以維持夫妻感情，遲啲你就明。」
「我諗我一世都唔會明，你慢慢，我返公司先。」
「等等先，你諗下，成世同一個女人做會悶㗎！久而久之你就會逃避行房，同老婆感情會慢慢變淡，得閒試下其他女人，你就會keep住有份罪疚感，返去自然對老婆好啲，同埋覺得同老婆做先係最舒服。」
「咁講法你原來係好偉大喎，有冇話畀老婆知你為呢段婚姻付出咗咁多？」
「痴線！行啦，去唔去呀？」
唉，總之我而家同老細出去做嘢就好大壓力，又怕佢不斷叫我一齊去滾，又怕佢有病，但唔通辭職咩？點同老婆講呀？我唔敢話畀老婆知老細成日慫恿我叫雞呀，到時唔使辭職，老婆都一定迫我劈炮。