比利時稅率高 同事普遍hea住做

我係一位喺布魯塞爾打工嘅香港人,基本上呢度嘅公司唔會請工作經驗少嘅非歐盟人士,但由於之前幾年都喺法國工作,所以膽粗粗去比利時搵工嘅過程比我想像中順利,唔識荷蘭文唔算好大問題,因為同事之間用英文都可以溝通,我亦都識少少法文。

或者係公司文化問題,我竟然覺得呢間比利時公司比起我喺法國做嘢嗰陣更輕鬆,我都唔係勤力嗰類,但已經算係office裡面比較積極嗰一班,呢度仲有一個新加坡人,大家差唔多同期入嚟,我曾經同佢講過:「公司幾千人,如果一半係請香港人,另一半應該炒得。」

然後個新加坡同事又同我講:「如果一半係請新加坡人,呢間公司都真係可以減一半人手。」

最初確實唔太習慣,難聽啲講,呢度起碼有3分2人係「呃飯食」,我嘗試將同事分成3類人,第一類係「勁hea」,返工好似為咗識朋友咁,雞毛蒜皮嘅小事都call meeting,然後裝模作樣開咗半日會,最終同乜都冇傾過係冇分別,一日開幾個會好似好忙咁,其實係想透過開會聯誼,夠鐘放工就約埋去飲嘢,佢哋最happy唔係friday night,反而係thursday night,有個詞語叫 jeudredi,每個星期嘅呢一日就特別多活動。

第二類係按章工作自我封閉型,做嘢比較負責,但只限份內事,佢哋係完全冇野心,總之做完嘢就走,偶爾會開下OT,不過離開咗公司就唔使皆意揾到佢哋,我一直以為自己係屬於呢一類,點估到我喺呢度原來已經係第三類,即係最積極嗰種。

第三類係點呢?就係唔想停留喺而家嘅職位,仲想向上爬,唔止會OT,仲會喺office hour以外覆下msg,公司嘅gathering一定參與,內部有咩自發性參加嘅training一定join,呢類人喺我哋公司可以話係少數民族,唔係講緊國籍,係講緊人數,大約得30至40人係咁。

其實我唔係博上位,我只係淆底,因為公司得我一個香港人,如果太hea就會好揚,何況我係靠公司幫我搞簽證而留低,其次gathering逢show必到,原因係我初初嚟到呢度冇朋友,與其返屋企宅,咁梗係識多啲人啦!所以我而家喺度都有幾多friend㗎!

公司其實都有做Appraisal,不過只係形式上要做,無論評分同評語高與低都好,根本就完全冇影響,我哋唔會有咩最佳員工選舉,唔會有咩勤工獎,但亦唔會有遲到罰錢之類嘅規則,簡單嚟講係唔會有任何競爭嘅感覺存在。

慢慢地我就了解到點解公司有第一同埋第二類人存在,因為比利時稅率係比法國更高,係唔係全世界最高我就唔肯定,不過喺歐洲應該數一數二。比利時單身無子女嘅勞工薪資稅率係51.5%,呢度係稅前人工加僱主要支付嘅社會保險,51.5%……

香港同比利時係有避免雙重徵稅協定,但係當中仲有其他細則,總之牽涉到稅收就好複雜,呢度唔詳細解釋,因為太煩喇,重點係我問過公司裡面一位土生土長,喺布魯塞爾長大嘅同事,佢真係咁答我:「升職加薪交多啲稅,扣完都係同冇加過差唔多,咁搏做乜?」翻譯完大致係咁嘅意思。

所以我後來都收返「呃飯食」呢個字眼,我錯喇,凡事唔可以只睇一面,當大家都唔去比較,只係專注自己嘅生活,專注自己嘅快樂,自然就冇咩欲望,識得隨遇而安。

而家每逢放假,我好多時都會返去法國探朋友,亦都會過去荷蘭嗰邊玩,地理位置上太近喇,雖然相對嚟講比利時係悶啲,不過我已經識得享受當地人緩慢而輕鬆嘅腳步。

差啲唔記得講,我都加入咗第一類人嘅「懷抱」😂開下會,識下朋友,放工即走去飲酒,周圍搵好嘢食,青口、窩夫,仲有朱古力,簡直係冇得輸!至於另一位新加坡同事就未係咁放得開,不過都歸化咗做第二類喇。

error: