本人女，29+1，而家呢份工做咗4年，人工$12,500，呢個數係未扣強積金，同齡有朋友已經搵緊幾萬蚊一個月，最低人工個friend都有二萬幾，始終呢個年齡已經出嚟做嘢一段日子，佢哋嘅收入同年資係成正比。
你問我得$12,500有冇少少自卑，話冇就一定呃你，但我又唔捨得辭職，因為份工太舒服喇，每日真正做嘢嘅時間加加埋埋肯定少過30分鐘，可以想像到我有幾得閒。
份工hea到咁，點解仲需要呢個職位？咁就拜我阿姐所賜喇，因為公司會畀每個department一個budget，你用唔晒即係唔使咁多，下一個年度就會cut，所以得閒嘅唔止我一個人，部門有6個人，工作量其實一個人都搞得掂，頂盡畀你兩個人已經綽綽有餘，而家6個人分（加埋阿姐total 7個），有乜辦法唔得閒。
呢啲唔係我揣測，係阿姐親口同我哋講， 佢嘅理據係今日唔知聽日事，而家得閒啫，唔代表下年同下下年都咁舒服，如果用唔晒請人嘅headcount同budget，畀老細cut咗要加返就好難，所以阿姐死都攬實咁多個位，寧願大家做少啲，都唔想之後走去求老細加返，咁當然啦，阿姐自己嘅工作量keep住咁少，佢梗係開心啦！
我唔知呀姐幾多錢人工，但係另外5個同事就同我差唔多，都係$ 12,000至$ 14,000之流，曾經都有人覺得份工太少錢、太悶、太無聊而resign，但有幾個鐵膽就一路呻份工冇前途，冇加薪，同時又賴死唔肯走，我就係其中一個鐵膽。
冇嘢做平時做乜呢？通常都係數手指同埋吹水，煲劇就唔得，因為我哋個部門喺路中間，非常開揚，hea得嚟要寧畀人知莫畀人見，最衰朝九晚六要坐定定喺Office，否則當part-time咁做都幾爽。
如果計年資，4年冇加過人工真係好痴線，另外幾個鐵膽比我做多幾年，佢哋話除咗第一年加過$500之後就一直維持原狀，聽落好唔人道，但如果計工作量，其實我都有自知之明嘅，每日真正做嘢嘅時間少過30分鐘，根本就冇嘢做，講真$ 12,500都畀多咗我。
懶呢樣嘢會成為習慣，有時同朋友傾開，知道自己人工少過出面一大截，都唔止一次有想轉工嘅衝動，但一諗起呢度咁舒服，除咗唔捨得之外，都好擔心唔適應外面正常公司嘅節奏，如果跳咗出去最後捱唔住冇得撈，你畀幾多人工我都冇用啦，所以轉工一事我長期得個諗字，冇鬥心呢啲嘢係本身性格，我又同屋企人住呢，冇咩經濟壓力，有時都覺得自己好頹。
想借呢段投稿問多啲人意見，如果你份工得$12,500，入職4年冇加過人工，可見嘅將來都似乎唔會有得加，不過份工就舒服到暈，每日真正做嘢嘅工時勁短，你哋又會唔會繼續做落去呢？
突然想聽意見係因為我細妹剛剛出嚟做嘢，佢完全冇經驗返一份侍應都有一萬四千幾，有一刻覺得好慚愧，雖然文職同侍應嘅工作性質好唔同，唔可以咁樣比較，但諗諗下自己做咗嘢咁多年嘢，人工仲低過剛畢業嘅細妹，呢幾年就好似白過咁樣，內心都有啲難受。
投稿讀者：Zita