公司早排請咗個新女同事，30幾歲，開始時好正常，但唔知搞咩每日嘅情緒都好大起伏，應該係話每個鐘都會跳掣，你完全估佢唔到，個感覺就係渾身帶刺，好似好多嘢都會介意，呢樣未算係重點，重點係佢介意嘅嘢好無厘頭。
舉個例，有一次我哋幾個同事出去食lunch，一坐低侍應就同我哋講：「可以scan呢個code，跟住用手提電話落單。」呢句好平常係咪？因為香港有唔少餐廳都係咁，不過新女同事聽完之後就無啦啦扯火，向住個侍應發脾氣。
「點解你企喺度唔幫我哋落單呀？下下都要個客自己用電話落，咁餐廳請你返嚟做咩呀？全自動化得啦！」
必須持平咁講，呢間餐廳我哋幾個同事係常客，服務態度同食物質素完全冇問題，否則都唔會成日嚟，而侍應循例同我哋講聲可以用電話落單嘅時候，語氣亦係十分好，所以新女同事九唔搭八噴到人一面屁，唔止侍應嚇親，我哋幾個同事亦唔知畀咩反應。
為咗平息尷尬，我選擇打圓場：「咁餐廳要顧及人手問題，同埋自己落單都ok吖，唔使咁大反應喎，你食咩？我幫你篤埋啦！」
「唔係你幫唔幫我篤埋呀，咁佢哋冇嘢做咁hea，咪即係冇服務囉！我之前試過有間餐廳係自己落單，啲侍應得閒到喺度傾計。」
侍應嘅態度都算係咁喇，仲笑笑口同我呢位新女同事講：「唔緊要，我幫你落單，請問想食乜嘢？」
「未諗到喎，一陣先嗌你。」
我心諗，今時今日咁嘅服務真係唔得㗎，好在我唔係嗰位侍應咋，否則就一拳中落佢度，仲使諗食咩？食兜槌窩麵啦！
講開食嘢就講多樣，新女同事成日話自己食咩都冇所謂，但係當有人揀咗食lunch嘅餐廳之後，佢就會嫌三嫌四，例如離開公司之前話去食日本嘢，佢明明答好。
去到餐廳之後：「我唔食生嘢。」
又例如話咗去cafe食，出發前佢明明又話冇所謂。
去到cafe之後：「我唔飲出面啲咖啡，咖啡機磨之嘛，好渣，根本唔值呢個價，自己沖仲好飲過佢啦！」
我哋班同事自此冇再同佢食lunch，又要受罪，又要驚得罪餐廳啲人，費事成班人要食拖鞋炒飯啦！所以你話我衰都係咁話，幾個同事私底下WhatsApp傾食乜，再扮約咗人然後喺出面等，總之唔想佢跟住嚟，道不同，各自修行啦！
Lunch可以唔一齊食，但日常工作冇辦法唔一齊做，新女同事平時仲有好多嘢會介意，一時話邊個邊個冇禮貌，行過唔打招呼（你邊位呀？一定要同你say hi咩！）一時又話邊個邊個行路唔帶眼撞到佢，總之就九萬幾樣嘢唔滿意，有時覺得佢做人好辛苦。
新女同事又試過投訴隔籬部門啲人戴口罩戴得唔正確，喂！你同我講做咩啫？夠薑你咪兜口兜面同人講囉，唔係期望我會幫你行過去訓斥啲人呀？有一日仲搞笑，佢無啦啦話自己為咗防疫一定會戴眼鏡喎！已經夠無厘頭啦，然後佢叫我哋唔好預期佢會戴con……
我：「邊個要求你唔好戴眼鏡要轉戴con？」
「我講定咋，總之我唔戴con唔化妝，因為我覺得冇需要。」
隻隻字我都聽得明，拼埋一齊就聽唔明，都冇人叫你除眼鏡同化妝，你無厘頭自己講嚟做咩呢？冇頭冇尾冇前因後果㗎喎！
不過呢幾單都未算經典，有次個客上嚟我哋公司開會，首先呢個男性客人已經好熟，本身份人好正經，開會講嘅嘢亦係公事，對方只係話：「搵日你哋上嚟我office吖，有啲新嘅sample畀你哋參考，順便介紹我啲人畀大家識。」
以上呢句你睇完有咩感覺？冇問題吖係咪？好普通嘅一句說話啫，點估到新女同事好大反應咁講咗一句嘢。
「你唔好預期我會著低胸短裙上嚟喎！我著牛仔褲㗎咋！」
小姐，你咩事呀？個客叫我哋去佢office睇sample咋喎，邊一句同埋邊一粒字係要求你低胸短裙上去呀？
新女同事無厘頭講完呢句咁唔大體嘅說話之後，會議室就好似有隻烏鴉飛過咁樣，個客由呆L咗變成好尷尬唔知點接，我哋老細就躁咗：「講咩低胸短裙呀？邊個叫你著低胸短裙呀？」
新女同事又真係敢駁咀：「我講定先啫，保障返自己嘅權益，冇特別，只係想講清楚出去見客唔會著低胸短裙，我唔會取悅男人。」
個客繼續呆，老細塊面就繼續黑，但又唔知講咩好，因為一切都係無厘頭，你係完全溝通唔到。
個客走咗之後，老細留咗我哋幾個喺房，包括呢位女同事，主要想問究竟頭先做乜，新女同事答：「冇呀，之前份工個上司嫌我著得唔夠formal，話我著褲去見客唔係咁好，點解女仔唔著得褲，男仔就可以著褲呀？」
一而再，再而三重複「無厘頭」呢個詞語，因為佢真係無厘頭到極點，突然將個問題牽扯到男女平等嘅範疇。Fine！當你上一份工可能遇過唔開心嘅事，咁但係頭先個客都冇要求低胸短裙，我自己身為女性亦唔覺得對方有任何冒犯嘅意思同企圖，你無啦啦做咩要警告人呀？
或者一個人嘅行為的確會受到經歷影響，但呢位女同事每日渾身帶刺咁返工，真係令人好唔舒服，可能佢只係想保護自己，不過唔應該舞刀弄槍攻擊咗人哋先，以餐廳用手提電話落單件事為例，個侍應根本冇諗住hea做，人哋介紹返有呢個功能啫，唔使下下咁有侵略性㗎喎！係咪有被害妄想症呀？
呢位女同事幾日前辭職，講咗一大輪公司呢樣嗰樣唔掂，是但啦！反正佢走咗，同事都會輕鬆啲。唔係唔體諒佢，不過出嚟社會做嘢，每個人都有自己嘅經歷同埋難處，冇義務承受你呢啲渾身帶刺嘅性格。