我的臥底朋友(End)

無論你今日幾時睇呢個《臥底大結局》,睇完畀個like,話我知你平安吖!

======
《臥底-End》

你班咸濕仔,係咪期待大結局加甜?好可惜,我冇上Candy屋企,改咗出街食飯,唔計係唔係臥底員工,呢間始終係姐夫嘅公司,有咩做得唔恰當會牽連好大,我又唔想拍散拖,之後如果愈嚟愈認真,總要帶返去見屋企人,現階段唔敢諗得太深入。

我唔想身份敗露,將來真係穿咗就將來嘅事,起碼仲喺呢間公司嘅時候絕對唔可以,否則會好尷尬,所以Gilbert問我:「Tim哥,老老實實,你同老細係咪本身識㗎?親戚?我都覺得奇怪㗎喇,以前見工一定係過HR再過我同埋Daniel,上次Home Office返嚟就見你無啦啦棟喺度。」

「真係唔識㗎!唔講嗰句都講埋喇,我係agency介紹嚟嘅,見工之前headhunt已經話我係replacement,強調呢間公司有呼吸心跳同身份證就請,因為guarantee period一過,就冇義務補返人代替之前個candidate,錢又冇得退,所以當日見工,老細劈頭第一句唔係問關於工作嘅嘢,而係問我會唔會做得長,開咗阿Rick啲千年蜘蛛網account之後,老細就叫我食早餐傾兩句,想確定我暫時唔會辭職。」

Gilbert:「唉,呢樣又真,之前啲新人冇個做得長,有時我未記得佢哋個名已經走咗,其實你幾有潛質,真㗎!畀心機做啦!」

一定會,話晒我份糧真係多過你,雖然只係維持三個月。

「Gilbert哥,唔好怪我太直,其實呢,新人做唔長,Daniel、肥仔風、Rick,同埋Cliff都有責任,佢哋啲態度簡直係世界級,不過你都……」

Gilbert:「係,有咩唔滿意呀Tim哥?」

「仲玩喎,我覺得你太chur,第一次同你上利豐我覺得好瘀,新人會無所適從,或者公司真係要提供下Training先。」

Gilbert:「Training好,Training好㗎!最近上fb成日見到個車志健,佢教人點sell嘢,好唔好叫老細請佢返嚟train下sales team呢?」

你哋明白點解Gilbert畀Daniel食住啦!勤力唔係大晒,On9始終係致命傷,不如我完成咗臥底contract之後,轉去幫姐夫做training啦,第一堂會教「你阿媽係女人」。

講開Daniel,佢reject咗姐夫offer,選擇拎三個月人工走,我問係咪不歡而散?

姐夫:「少少梗有嘅,不過我將佢老婆件事同咗Louis講,Louis自然會畀說話佢聽㗎喇,一早講過,Louis最唔鍾意人搞搞震,佢寧願大家一齊做又三十六,唔做又三十六,你影響到佢退休就冇情講,我全程冇話過Daniel一句,深圳offer開咗畀你,我預咗佢唔要,大家成年人,最緊要好嚟好去,而家隔山打牛,Louis想安穩就要拎勇氣出嚟做衰人,如果佢怕得罪Daniel,我就覺得Louis唔值8皮嘢人工,唔通要我呢個老細做衰人呀?」

其實我未入姐夫公司之前係做攝影freelance,有次幫雜誌去studio影個女明星,當時佢嚟到仲未化好妝,studio有職員想搵個女明星合照,女明星話ok冇問題,點知佢個助理衝出嚟攔住,studio職員行埋一邊係咁鬧個助理仆街:「人哋artist都話得,個助理扮L晒嘢。」我想講呢,未埋位前行去同女明星講一陣打算點影嘅時候,我聽住佢吩咐助理咁做㗎,人哋係明星,唔方便做衰人,總要有人做醜人嘅。

點都好,害群之馬走晒,sales team氣氛會唔會好咗?暫時言之尚早,因為我都未坐夠3個月,我問過姐夫可唔可以提早走?

姐夫:「都得既。」

「照出埋淨低啲糧?」

姐夫:「癲線!一係你坐足,好似最初咁講做足三個月。」

「嘩,係咪咁計呀?」

姐夫:「你又係咪咁計呀?不如長遠留低啦!你都做得ok吖!」

「5萬?可以諗諗!」

姐夫:「唔係呀,第四個月變返正常15000,一係咁喇,16000,加你一千。」

「16000同Gilbert去一次利豐都唔夠我睇精神科啦!返去做影相freelance job好過。」

我的確有一刻諗過留低幫姐夫,大前提係繼續出5萬蚊人工。

姐夫話將來想做文職可以考慮返嚟,如果我自己出去搵工,就要記住幾樣嘢。

首先,佢知我份freelance平均只係幾千蚊至萬鬆啲一個月,如果真係有心轉行要趁早,年紀愈大愈冇籌碼轉行,成本亦都會更加高,將來搵唔到食再求其打份工維持生計,可能一世人都要做一啲自己唔enjoy嘅工作。

另外,姐夫叫我學多啲嘢,日文英文俄文咩都好,甚至寫網頁整水喉學烹飪都得,每一個想去學習或者進修嘅諗法,其實可能係未來嘅你,向而家嘅你發出求救訊號。

「嘩,咁L深嘅,如果我想去車志健度學嘢呢?」

姐夫:「咁你聽日可以唔使返工。」

「如果有一日Gilbert話請車志健返嚟train班sales,你記得你講過呢句呀!」

大家唔使擔心,Gilbert冇咁提議,佢仲升咗一級,而我仲喺姐夫公司做緊,而家再請多個新人返嚟,名義上係補阿Rick個位,實際上係之後接替我,拎埋剩低合約啲錢我就走㗎喇。

至於Candy……真係未開始。乜嘢係曖昧?就係人人都以為你哋喺埋一齊,但只有自己先最清楚彼此之間嘅距離。

#臥底
#大結局
#後會有期

======

前文重溫

臥底 1
https://hkofficedaily.com/?p=10344

臥底 2
https://hkofficedaily.com/?p=10391

臥底 3
https://hkofficedaily.com/?p=10386

臥底 4
https://hkofficedaily.com/?p=10382

臥底 5
https://hkofficedaily.com/?p=10404

臥底 6
https://hkofficedaily.com/?p=10414

臥底 7
https://hkofficedaily.com/?p=10425

臥底 8
https://hkofficedaily.com/?p=10441

臥底 End
https://hkofficedaily.com/?p=10449

error: