公司有個position急住要人，所以同一時間自己出招聘廣告同埋搵headhunt幫手，打頭陣嘅係一個女仔，上到嚟office嗰下已經令到全場嘩嘩聲，女同事竊竊私語，男同事就個個擰轉身睇，鬼咩！個女仔本身都夠靚，仲要低胸短裙。（**未經同意下，文章嚴禁以任何形式轉載，如發現一定以法律行動追究到底。)
我作為女人都睇到呆晒，視覺方面無可否認係好索，但呢身打扮嚟見工似乎唔啱場合喎，好在我公司冇樓梯，否則條短裙走硬光，胸大都算喇，呢啲嘢係天生，迫爆衫佢都唔想，不過加埋個斜孭𠝹波袋就好突出囉！
臨入房interview之前，有個隔籬team嘅senior走嚟八卦：「個女仔見咩position㗎？」
我：「關你鬼事咩！Ivan個department請人，又唔係你嗰邊！」
Senior：「請佢啦！請咗佢之後肯定其他同事都精神啲，如果Ivan嗰邊唔適合，一係睇下我呢邊用唔用得著，咩position啫？」
我：「死開啦咸蟲 ！你個department有冇批budget請人呀？我呢個仲要經headhunt，到時要畀佣係咪喺你人工度扣？」
呢個世界真係好現實，雖然個senior係半講笑形式，但人哋in咩位又唔知，有冇料又唔知，低胸短裙𠝹波袋啫，咁就輕易引起一個department head嘅注意。
不過外型再索都好，一開口interview就發覺唔對路，做咗咁多年HR，第一次聽人咁樣自我介紹。
「我叫Michelle，今年27歲，志願係做空姐。」
空氣靜止咗10秒，我以為係香港小姐問答環節，你志願係做空姐唔去國泰？跟住呢？冇嗱？自我介紹就咁完？
我：「係，你可以繼續。」
「冇喇，哈……諗唔到。」
佢真係冇再介紹落去……
我：「咁不如你講下之前份工平時要做乜？」
「哦，之前份工我做文員。」
我：「係，我見到你CV寫咗，具體每日工作內容可唔可以形容下？」
「都係文員啲嘢咋，冇咩特別。」
正當我想叫佢返屋企等消息嘅時候，房門突然打開，原來係經理Ivan入嚟，佢話想一齊in……
Ivan：「In成點呀？」
我：「啱啱in完。」
Ivan：「咁快？重新in過吖，等我睇下先……（Ivan一路講一路拎起枱面份CV，瞄咗眼求職者個名），Michelle，你上一份工平日做啲咩㗎？」
「頭先問咗嗱，都係做啲文員嘢。」
話咗啦！唔使再in落去㗎喇！成件事完咗㗎喇！
Ivan：「咁樣，點解會辭職嘅？」
估唔到Ivan呢個問題竟然可以令Michelle長篇大論咁講嘢！
「因為我同啲同事唔夾，做嘢唔夾，佢哋又玩小圈子杯葛我，我同呢班人夾唔到囉！間公司又廢，老細又廢，人工加得雞碎咁多，佢冇腦㗎喎……我指個老細，啲嘢係咁改改改，有時搞啲文件都畀佢玩死…….」
原來呢個Michelle係可以講嘢超過兩句㗎，佢足足講咗15分鐘都未停，全部係鬧舊公司、鬧舊老細、鬧舊同事。
Ivan似乎都覺得情況不妙，所以佢就打斷Michelle，再問另一條問題：「不如你講下自己有咩優點，點解我哋要請你吖！」
Michelle：「優點？唔……我會睇下公司有冇前景囉……唔……近唔近屋企？都係一個考慮因素……係囉……都係睇呢啲咁啦！」
乜嘢呀！而家叫你講自己嘅優點呀！唔係問你想入一間點嘅公司呀！答非所問，仲要口窒窒。
成個interview完咗，我都唔知in咗啲乜，Ivan都認同，問我做咩會叫呢個女仔上嚟見工，我就同佢講返個女仔係由獵頭公司推薦，轉頭就會打去鬧個headhunter。
同日仲有3個我自己出招聘廣告搵返嚟嘅求職者，真係冇比較冇傷害，個個嘅education background、working experience、見工衣著，仲有表達能力都喺Michelle之上，正確嚟講係贏幾條街。
個headhunter可能畀我鬧完，之後推薦多兩個candidate過嚟都對辦，expected salary仲要少過Michelle，不過都係我自己廣告搵返嚟啲人最似樣，求其叫Ivan合埋眼揀個都掂呀！
意想不到嘅係，Ivan竟然快一步搵我……
Ivan：「你叫上次低胸短裙嗰個女仔……唔記得叫咩名，總之叫佢下星期一返工吖！」
我：「嗰個Michelle？第一日第一個女仔喎！係咁鬧舊公司嗰個喎！」
Ivan：「係呀！」
我：「點解係Michelle呀？第一日仲有個Anson呢？第二日個Patrick同Doris，仲有噚日個阿May，呢啲全部都in得好好喎！仲要係自己廣告搵返嚟，可以慳埋headhunt啲佣。」
Ivan：「你幫我問咗Michelle先啦！最好星期一返到工，如果佢唔得你再同我講。」
喂！唔好咁樣啦！個個求職者都係fit馬，個個嘅preparation都咁好，呢啲並唔係我眼紅人哋波大樣靚，因為每個求職者我都有份in㗎！你請個唔適合嘅人返嚟，遲啲做兩做又走，最後咪一樣會煩到我！
可惜無論我點質疑都好，最終依然反對無效，Ivan堅持要請Michelle，如果其他求職者知道自己咁樣輸法肯定會瞓唔著，連畀我鬧嗰個headhunter都反問：「Michelle？嗰次in完你唔係打嚟鬧我咩？點解嘅？」
我：「有咩點解？除咗個經理鹹濕之外，我仲可以有咩解釋？出invoice啦！找數畀你哋headhunt公司呀！」
見工，有時就係咁唔公平，所以有啲求職者覺得自己in得好好都冇下文，千祈唔好懷疑自己嘅實力，因為背後可能有其他因素係你哋唔知道。見工著低胸短裙再孭個𠝹波袋，自我介紹話其實想做空姐，問佢覺得自己有啲咩優點，佢答非所問話視乎公司地點近唔近，interview大部分時間用嚟鬧舊老細舊同事，結果……我哋請咗……
**未經同意下，文章嚴禁以任何形式轉載，如發現一定以法律行動追究到底。