投稿讀者：超級經理人
幾個星期前約咗朋友喺尖沙咀食飯，獨自沿住加連威老道行去麼地道嗰邊，途中有個西裝友截住我：「小姐小姐，我係XXX Model公司，呢張係我卡片，唔知你有冇興趣拍廣告呢？我哋手上有隻首飾廣告好啱你。」
「冇！」痴媽根，戴住口罩都話我啱拍廣告。
條西裝友繼續跟住我：「唔係喎小姐，頭先迎面見到你已經覺得好適合，或者你考慮下先吖，大家交換個電話，你再上嚟我公司傾下。」
我笑而不語，因為相同嘅工作我做過～～～～兩日咁多，當時啱啱出嚟社會冇耐。
我唔係做過Model，我係做過「星探」，通常呢類呃人嘅所謂Model公司一開始唔係請星探，佢哋會巧立名目改埋啲聽落比較正常嘅職位名，例如藝人聯絡專員或者保姆，然後上到去見工嗰陣就會說服你做「星探」，講到你可以幫佢發掘一啲素人做Model或者明星，仲有佣分。
當時做呢份工就係畀佢job ad嘅title「藝人聯絡專員」呃咗，job duties都係寫啲負責協調藝人工作、編排日常拍攝流程、出入拍攝場地照顧藝人……等等，interview嘅時候就話「藝人聯絡專員」呢個位啱啱請咗人，不如試下做「星探」，學下嘢，賺嘅錢又多啲，累積咗經驗先之類，其實望返轉頭好似坊間嘅倫敦金或者傳銷公司，明明就係要你做sales，又扮到請admin請文員，呃人公司嘅手法都係千篇一律。
我嗰陣未接觸過星探呢個行業，唔知佢係點呃人，完全冇呢方面嘅認識，加上真係搵唔到工，所以就返住先。第一日返工，佢哋就教我點樣喺街發掘素人，每人都會被分去唔同嘅team，再由team head帶住去不同地區，最熱門當然係尖沙咀同埋銅鑼灣，與其話發掘「素人」，不如話去搵「獵物」更貼切。
咁你知啦，耐唔耐梗有啲明星歌星話自己係由星探發掘，但你睇真啲先會知佢哋原來有背景，例如屋企好有錢，又唔知識邊個靠關係，好多人聽到「星探發掘」就上晒腦，當然真實中的確有星探嘅，不過一定唔多，更加唔會流連街頭周圍搵素人簽約拍廣告，所以我第一日返工已經提高戒心，同時又好想知道呢間公司咩葫蘆賣咩藥。
跟team head出到街「做嘢」，我更加肯定呢份工係呃人，因為帶隊個team head從遠處觀察我搵人，跟住叫咗我返埋嚟訓話：「你唔好搵嗰啲同朋友一齊行街嘅人吖嘛。」
我：「不過頭先個女仔真係靚喎！」
「我哋唔係要靚呀！佢有friend喺隔離好難sell㗎！一陣佢想做Model，啲朋友又喺隔離講呢樣講嗰樣阻住晒，你搵啲獨行俠，一個人行街嗰啲。」
好啦！硬住頭皮做埋先，繼續睇你哋間所謂Model公司搞乜鬼，先後行咗去兩個獨行人士度派卡片之後，team head又唔滿意，再一次叫我行埋側邊訓話：「你頭先搵嗰兩個人冇用㗎，男嗰個著住波褲，拎住個籃球，女嗰個用埋啲唔知咩cheap雞手袋，你要搵就搵……嗱，你睇下嗰度，見唔見到嗰個女仔？孭名牌袋，著到好靚，戴住隻勞力士嗰個，最衰佢同男友一齊，總之你搵呢類，見佢自己行街就得㗎喇，見到呢啲就行埋去派卡片，話有廣告好適合佢，明唔明呀？」
明，梗係明啦！呃人吖嘛！向一個人行街，兼且身光頸靚嘅人埋手吖嘛！
同日已經想唔做，不過好奇心驅使我返多一日，好想知呢間Model公司係咩料，因為同一時期仲有幾個新人返工，第二朝MK管理層似乎收到風，我哋幾位同期入職嘅新員工做唔到嘢，所以晨早就搵我哋開會傾：「阿仔阿女，你哋畀心機啦！你睇下師兄師姐幾叻，一陣就約咗人上嚟interview喇，你哋都勤力啲，做好本份約到人上嚟就得㗎喇，其他嘢交畀我哋，有佣㗎，著緊啲啦！」
有個新人可能仲未明，佢直接問個MK管理層：「即係要佢哋接到廣告，我哋先有佣分呀？咁咪好耐先一次囉！如果上嚟casting唔啱，咪又係冇佣囉！」
MK管理層：「唔使，我哋會sell佢哋上course，可能佢哋唔識擺pose呀，又或者咬字唔清楚呀，我哋都有course幫佢哋，總之你做好本份啦，你約到人上嚟casting就得㗎喇，其他嘢交畀我哋sell。」
辭職，唔做，呢啲公司信都唔使遞，擺低疊冇印名，得公司名，中間空白嘅卡片就走人。
社會上要埋沒良知嘅工作，又點止得某個行業吖，要靠害人先搵到錢嘅工，一定會有報應。
嚴格嚟講，我只係返咗工一日半，喺公司出入時都見過有男有女上嚟公司做所謂casting，希望各位發明星夢嘅同時，都要小心畀人呃，好多所謂明星Model講咩「畀星探發掘」，真係會累死唔少人，如果你覺得真係咁多星探喺身邊，唔緊要，去人哋公司嗰陣麻煩擺低啲信用卡同提款卡喺屋企，再同信得過嘅人講聲，最好約定一段時間後就打電話畀你，有起事上嚟都可以借住個電話甩身吖嘛，總之市道愈差，就愈多呃人嘅工同埋求職陷阱，萬事小心啦！